وەزارەتی ناوخۆی عێراق: هیچ هێزێک لە عێراقەوە ڕەوانەی سووریا نەکراوە

ئاڤا نیوز

 

وەزارەتی ناوخۆی عێراق ئەو دەنگۆیانەی باس لە ناردنی هێز بەرەو سووریا دەکات لەپێناو پاراستنی سنوور یان بەشداریکردن لە جەنگەکەی سووریا، ڕەتدەکاتەوە  و دەڵێت "قسەی بێ بنەمایە".

 

وێنە گەورەکە: پێشتر ئاژانسی "ڕۆیتەرز" ئاشکرای کردبوو، بەشێک لە گرووپە چەکدارەکانی عێراق بۆ بەهاناوەچوونی سوپای سووریا ڕەوانەی ئەو وڵاتە کراون بۆ ڕێگریکردن لە پێشڕەویی هێزەکانی ئۆپۆزسیۆنی سووریا، بەڵام حکومەتی عێراق ئەو هەواڵە ڕەتدەکاتەوە.

 

ڕاگەیێنراوی فەرمی: میقداد میری، وتەبێژی وەزارەتی ناوخۆی عێراق لە کۆنگرەیەکی ڕۆژنامەوانیدا وەڵامی دەنگۆی چوونی چەکدارانی گرووپە چەکدارەکان بۆ سووریا دایەوە و ڕایگەیاند: ئەم زانیارییانە تەنیا قسەی پەخشانیین (دوورن لە ڕاستی) و هیچ جووڵەیەک لەسەر سنووری سووریا بەدی نەکراوە.

 

میری ئاماژەی بەوەش کرد: ئێستا سنوورەکانی عێراق لەوپەڕی بەهێزیدایە، لە مێژووی دروستبوونی دەوڵەتی عێراق سنوورەکانمان بەهێزی وای بەخۆوە نەبینیوە. هاوکات وەزارەتی ناوخۆ بە درێژایی دوو ساڵی ڕابردوو لە هەموو سنوورەکانەوە هەوڵی ناوازەی داوە، بە دیاریکراویش سنووری سووریا.

 

لەلایەکی دیکەوە: وتەبێژی وەزارەتی ناوخۆ لەبارەی بەزاندنی سنووری نێوان عێراق و سووریا دڵنیایی دا:  بە هیچ شێوەیەک بەزاندنی سنوور لە عێراقەوە بۆ سووریا ڕوونادات، لەبەرئەوەی بەگوێرەی ئەو ڕێوشێنانەی گیراونەتەبەر و بوونی کەرتە سەربازییەکان لەسەر سنوورەکان و ئەو پێداویستییە لۆجیستیانەی لەبەر دەستیانە، بەردەوامن لە پاراستنی سنوور.