لە سلێمانی ئۆتۆمبێلی بێ سەرەتا و ژمارە ساختە قەدەغە دەکرێت

ئاڤا نیوز

 

لیژنەی باڵای ئەمنیی پارێزگای سلێمانی، سەبارەت بە زۆربوونی ئۆتۆمبێلی بێ سەرەتا و هەڵگری ژمارە ساختە و جامڕەش لە سنووری پارێزگاكە هۆشداریی دەدات.

 

ڕاگەیێنراوی فەرمی: لیژنەی باڵای ئەمنیی پارێزگای سلێمانی ڕایگەیاند: ئێستا بوونی سوارڕەوی بێ سەرەتا و هەڵگری ژمارەی ساختە و جامڕەش بە شێوەیەکی نایاسایی خەریکە دەبێتە دیاردەیەک لەسەر شەقامەکان کە بێگومان ڕەنگدانەوەی نەرێنی دروست دەکات لەسەر ناو و ناوبانگی هەرێمی کوردستان و شاری سلێمانی، بەدەر لەوەش لە ڕووی ئەمنی و یاسایی و تاوانکارییەوە کاریگەریی خراپ و لێکەوتەی مەترسیداری هەیە.

لەلایەكی دیكەوە: لیژنەی باڵای ئەمنیی سلێمانی سەبارەت بە ڕێگریكردن لە دیاردەی ئۆتۆمبێلی بێ سەرەتا و ژمارە ساختە ئەم بڕیارانەی خوارەوەی دا:
 
1- دەستبەسەرداگرتن و گرتنەبەری ڕێکكاری یاسایی بەرامبەر هەر جۆرە سوارڕەوێکی نایاسایی، (بۆ خاوەنەکانیان هەیە کە بیبەنە دەرەوەی هەرێمی کوردستان)، هاوكات سەرجەم بازگەکان دەستکراوە دەبن و ڕێگە نادەن دوای بڵاوکردنەوەی ئەم بڵاونامەیە لەژێر هیچ پاساو و بیانوویەک هیچ جۆرە سوارڕەوێکی بێ سەرەتا بێتە ناو شاری سلێمانی. 

2- گرتنەبەری ڕێکكاری یاسایی بەرامبەر هەر جۆرە سوارڕەوێک کە هەڵگری تابلۆی ساختەو نایاسایی بێت.

3- هیچ ڕێگەپێدان و نووسراوێک لە هەر لایەنێک جگە لە بەڵگەنامەی فەرمی و یاسایی کە لەلایەن بەڕێوەبەرایەتی هاتووچۆوە دەرکراوە کاریان پێ ناکرێت.