بڕیارە بەغدا 133 ملیار دیناری دیکە بۆ مووچەی مانگی 10 بنێرێت

ئاڤا نیوز 

 

761 ملیار دینارەکەی بەغدا هێشتا لە لقی هەولێری بانکی ناوەندییە و هەرێمی کوردستان ئامادە نییە وەریبگرێت، بڕیارە بەغدا 133 ملیار دیناری دیکە بۆ مووچەی مانگی 10 بنێرێت.

 

وێنە گەورەکە: هەرێمی کوردستان 996 ملیار دیناری بۆ دابینکردنی مووچە پێویستە، واتا بەو 761 ملیارەی ناردوویەتی 235 ملیار دینار کورتهێنان هەیە، ئێستا بە داهاتی ناوخۆ ناتوانرێت ئەو کورتهێنانە پڕ بکرێتەوە. کێشەکە ئەوەیە چاوەڕوان دەکرێت بۆ مانگەکانی 11 و 12ش بەغدا هەمان بڕ بنێرێت و هەمان کێشە دووبارە ببێتەوە.

 

بەدواداچوونی تایبەت: بەپێی بەدواداچوونەکانی ئاڤا نیوز ئێستا هەردوو وەزارتی دارایی هەرێمی کوردستان و عێراق لەسەر هێڵن تاوەکو بەغدا بەشێکی کورتهێنانی مووچە بۆ مانگی 10، 11 و 12 پڕ بکاتەوە، ئەوەی کە داوا دەکرێت گواستنەوەی پارەیە بە بڕی 400 ملیار دینار بۆ مووچە، پێشتر بەغدا ئەو پارەیەی لە بودجەی وەبەرهێنان بۆ بودجەی تەشغیلی گواستبووەوە، بەڵام گواسترابووەوە سەر مووچەی کەسوکاری شەهیدان و ئەنفالکراوان، بەڵم بەهۆی ئەوەی لە مووچەی کەسوکاری ئەنفالکراوان کورتهێنان نەبووە، پارەکە بۆ خانەنشینان دەگوازرێتەوە. ئەگەر گواستنەوەکە تەواو ببێت، ئەوا ئەو 400 ملیار دینارە دابەشی سێ دەکرێت و بۆ هەر مانگێک 133 ملیار دینار دەکات، واتە بۆ مانگەکانی 11 و 12 لەگەڵ هاتنی 761 ملیار دینارەکە، 133 ملیار دیناری دیکەش دەنێردرێت.

 

زانیاریی زیاتر: سەرچاوەیەکی باڵا لە وەزارەتی دارایی بە ئاڤای نیوزی ڕاگەیاند: ئەو بڕە پارەیە زۆرە و مانگی ڕابردووش فشاری خەرجی زۆر بووە، بۆیە تاوەکو پارەی دیکە لە بەغداوە نەنێردرێ، ناتوانن مووچەی مانگی 10دابەش بکەن.

 

ئەوەی پێویستە بیزانیت: حکومەتی هەرێمی کوردستان بۆ دابینکردنی موچەی مانگی نۆ 135 ملیار دینار کورتهێنانی پڕکردەوە، جگە لە ناردنی 77 ملیار دینار لە بەشی گەنجینەی فیدراڵی، بەڵام بۆ مانگی 10 بە کورتهێنان و بەشی گەنجینەی فیدراڵی زیاتر لە 300 ملیار دینار دەکەوێتە سەر هەرێمی کوردستان.