هۆشدارییەک لە سەرۆکی دەستەی تەحریر شام بۆ سوودانی

ئاڤا نیوز

 

سەرۆکی دەستەی تەحریر شام لەبارەی هێزەکانی حەشدی شەعبی و پەلهاویشتنیان بۆ سووریا، هۆشداری دەداتە سەرۆکوەزیرانی عێراق.

 

وێنە گەورەکە: دوای بەدوای هێرشی هێزەکانی ئۆپۆزسیۆنی سووریا لەژێر ناوی دەستەی تەحریر شام بۆ سەر شاری حەلەب و دەنگۆی چوونی هێزەکانی حەشدی شەعبی و هێزەکانی حیزبوڵڵای لوبنان، وەک دوو هێزی لایەنگری ئێران بۆ سووریا بە مەبەستی پاڵپشتی لە هێزەکانی سووپای سووریا بڵاوکرایەوە.

 

پەیامی فەرمی: محەممەد جۆلانی، سەرکردەی دەستەی تەحریری شام لە پەیامێکدا داوا لە محەممەد شیاع سوودانی، سەرۆکوەزیرانی عێراق دەکات ڕێگە بە هێزەکانی حەشدی شەعبی و گرووپە چەکدارەکانی نزیک لە ئێران نەدات بچنە نێو خاکی سووریا.

 

پێدراوە ڕاستییەكان: ئەو پەیامەی سەرکردەکەی دەستەی تەحریر شام لە کاتێکدایە، پێشڕەوی هێزەکانیان بەرەو پارێزگای حەما بەردەوامە و چەندین شوێنی گرنگی ئەو پارێزگایەیان کۆنترۆڵ کردووە لەوانە، فڕۆکەخانەی سەربازیی حەما.

 

ئەوەی لەوبارەیەوە دەگوترێت: چەند سەرچاوەیەکی عێراقی پێشتر بۆ ئاژانسی ڕۆیتەرز ئەوەیان پشتڕاستکردووەتەوە کە لە عێراقەوە نزیکەی 300 چەکداری عێراقی چوونەتە خاکی سووریا، هاوکات ڕۆژنامەی واشنتن پۆست لەسەر زاری چەند سەرچاوەیەکەوە ڕایگەیاند، ئێران وەک پشتیوانییەک بۆ سوپای سووریا لە بەرپەرچدانەوەی پێشڕەوی لەناکاوی گرووپە چەکدارییەکانی ئۆپۆزسیۆنی سووریا، چەکدارانی حیزبوڵڵای لوبنانی و گرووپە شیعەکانی عێراقی لە سووریا بڵاودەکاتەوە.