هەسەدە: تەحریر شام هەڵمەتی ڕفاندنی لە گەڕەکە کوردییەکان دەستپێکردووە

ئاڤا نیوز

ناوەندی ڕاگەیاندنی هێزەكانی سووریای دیموكرات ڕایگەیاند، چەکدارانی تەحریر شام، هەڵمەتێكی فراوانی ڕفاندنی كەسانی بێ چەکی لە گەڕەكی شەهبای باكووری شاری حەلەب دەستپێكردووە.

 

وێنە گەورەكە: ماوەی چەند ڕۆژێكە شەڕ و پێكدادان ناوچەكانی باكووری سووریا و شاری حەلەب گرتووەتەوە، هێزەكانی ئۆپۆزسیۆنی سووریا بەشێكی زۆری شارەكەیان كۆنتڕۆڵ كردووە، بەهۆیەوە دوو گەڕەكی كوردنشینی حەلەب، لەژێر گەمارۆی سەختی شەڕ و برسیکردن دان. هەسەدەش گرووپە چەکدارەکان بە ڕفاندنی هاووڵاتیان تۆمەتبار دەکات. 

 

ڕاگەیێنراوی فەرمی: ناوەندی ڕاگەیاندنی هێزەكانی سووریای دیموكرات "هەسەدە" لە ڕاگەیێنراوێكدا بڵاویكردووەتەوە، میلیشیاكانی تەحریر شام زیاتر لە 120 ئۆتۆمبێلیان ڕفاندووە كە سەدان هاووڵاتی سڤیل لەنێویاندا بووە و بەنیازبوونە بەرەو ناوچەكانی ژێر حكومڕانی هێزە كوردییەكان كۆچ بكەن.

 

زانیاریی زیاتر: ئەو سەرچاوەیە ڕاشیگەیاندووە، میلیشیاكان هاووڵاتییانی ڕفێندراویان بەرەو ناوچەی شێخ نەجار بردووە كە ئێستا ناوچەیەکی چۆڵكراو و بێ خزمەتگوزارییە.

 

ئەوەش بزانە: گروپە چەكدارەكان زیاتر لە 15 هەزار كەسی سڤیلیان بە بارمتە گرتووە و برسیێتی بەسەر سەپاندوون، ڕێگری دەكات لە گەیشتنی ئاو و خۆراكی پێویست بۆیان.