دوو گرووپی بازرگانیکردن بە ماددەی هۆشبەر لە دهۆک دەستگیر دەکرێن

ئاڤانیوز

 

ئەمڕۆ پێنجشەممە لەلایەن بەڕێوەبەرایەتیی نەهێشتنی ماددەی هۆشبەر دوو گروپی بازرگانیکردن بە ماددەی هۆشبەر دەستگیرکران.

 

ڕاگەیێنراوی فەرمی: سەرچاوەیەکی تایبەت لە بەڕێوەبەرایەتیی نەهێشتنی ماددەی هۆشبەر لە پارێزگای دهۆک، بە ئاڤا نیوزی ڕاگەیاند: دوای کۆکردنەوەی زانیاریی و چاودێریکردن لەلایەن هێزەکانی ئاسایشی نەهێشتنی ماددەی هۆشبەر، توانیمان دوو گرووپی بازرگانیکردن بە ماددەی هۆشبەر دەستگیر بکەین، کە هەر گرووپێک پێکهاتبوون لە چوار تا پێنج کەس و یەکێک لە ئەندامەکانیان ئافرەت بوو.

 

زانیاریی زیاتر: کاری ئەو گرووپە فرۆشتن و بڵاوکردنەوەی ماددەی هۆشبەر بوو لە نێو گەنجان، سەرجەم  دەستگیرکراوان خەڵکی پارێزگای دهۆکن، لەکاتی دەستگیرکردنییان دەستبەسەر چەک و تەقەمەنی گیراوە لەلایەن بەشێک لە ئەندامانی گرووپەکە.

 

باکگراوند: لە دووهەفتەی ڕابردوو لە پارێزگای دهۆک لەلایەن بەڕێوەبەرایەتیی نەهێشتنی ماددەی هۆشبەری دهۆک زیاتر لە 10 کەسی تر لەسەر بازرگانیکردن بە ماددەی هۆشبەر دەستگیر کراون.