هێرشی مووشەکی دەکرێتە سەر بنکەی سەربازی هێزەکانی ئەمریکا لە بەغدا

ئاڤا نیوز

 

هێرشی مووشەکی لە ڕێگەی کاتیوشاوە دەکرێتە سەر بنکەی سەربازیی ڤیکتۆریا لە نزیک فڕۆکەخانەی نێودەوڵەتیی بەغدا

 

وێنە گەورەکە: هەر کاتێک ناوچەکە پەرەسەندنێکی نوێی بەخۆیەوە بینیبێت، بەرژەوەندییەکانی ئەمریکا لەو ناوچانە کراونەتە ئامانج. ئەو کاتەش کە ئیسرائیل هێرشی زەمنی سنوورداری بۆ سەر ژێرخانی حیزبوڵڵا لە لوبنان ڕاگەیاند، هێرشی مووشەکی کرایە سەر فڕۆکەخانەی بەغدا و بنکەی سەربازی ڤیکتۆریا کە هێزەکانی ئەمریکا و هاوپەیمانانی تێدا جێگیرکراوە.

 

زانیاریی بەدەستهاتوو: سەرچاوەیەکی ئەمنی عێراقی ڕایگەیاند: بە مووشەک هێرش کرایە سەر بنکەی سەربازیی ڤیکتۆریا کە هێزەکانی ئەمریکای تێیدایە لە نزیک فڕۆکەخانەی نێودەوڵەتیی بەغدا.

 

ئەوەی پێویستە بیزانیت: دوایین جار سەرەتای مانگی 10ی ئەمساڵ بوو  لە ناوچەی عامرییەی بەغداوە لە لایەن هێزێکی نادیارەوە بە سێ مووشەک هێرش کرایە سەر بنکەی ڤیکتۆریا، ئەوکات سەرۆکوەزیرانی عێراق فەرمانی کرد لێکۆڵینەوە بکرێت و لایەنی کەمتەرخەمیش سزابدرێت.