حومس دەبێتە چەقی ململانێکانی سووریا

ئاڤا نیوز

دوای کۆنترۆڵکردنی پارێزگاکانی حەلەب و حەمما، چەکدارانی تەحریرولشام لە پێشڕەویدان بۆ کۆنترۆڵکردنی چەقی ململانێکانی سووریا کە شاری حومسە.

 

وێنە گەورەکە: ماوەی هەفتەیەک دەبێت چەکدارانی دەستەی تەحریرولشام لە پێشڕەوی و ڕووبەڕووبوونەوەی بەردەوام دان و بەشێک لە شارەکانی سووریایان کەوتووەتە ژێر دەست و هەنگاوی داهاتوویان بۆ کۆنترۆڵکردنی شاری حومسە. 

 

لێدوانی فەرمی: ڕوانگەی سووری بۆ مافەکانی مرۆڤ ڕایگەیاند: دوای نزیکبوونەوەی هێزەکانی تەحریرولشام لە پارێزگای حومس سوپای سووریا لەو ناوچەیە دەستیان بە کشانەوە کردووە. 

 

لەلایەکی دیکەوە: سوپای سووریا ڕەتیکردەوە کە هێزەکانی لە پارێزگای حومس دەستیان بە کشانەوە کردبێت. 

 

زانیاریی زیاتر: حومس سێیەم گەورەترین شاری سووریایە و ژمارەی دانیشتووانەکەی زیاتر لە یەک ملیۆن و 400 هەزار کەسە، نزیکەی 40 کیلۆمەتر لە  پارێزگای حەمما دوورە، نزیکەی 144 کیلۆمەتر لە دیمەشقی پایتەخت دوورە کە ئامانجی کۆتایی ئەو گرووپە چەکدارییەیە.

 

باکگراوند: لە 27 نۆڤێمبەرەوە تا ئێستا بەهۆی گرژی و ئاڵۆزییەکانی نێوان سوپای سووریا و گرووپە چەکدارەکانی ئۆپۆزسیۆن زیاتر لە 826 کەس کوژراون و سەدان هەزار کەسی دیکەش ئاوارەبوون.