یەکگرتووی ئیسلامی 10یەمین کۆنگرەی لە هەولێر دەبەستێت

ئاڤا نیوز

 

یەکگرتووی ئیسلامی کوردستان 10مین کۆنگرەی خۆی لە هەولێر دەبەستێت، هەموو شتێک پێش وەخت یەکلایی دەکاتەوە، لە کۆنگرەدا تەنیا دەنگیان لەسەر دەدرێت.

 

وێنە گەورەکە: بڕیارە 27-12-2024، یەکگرتووی ئیسلامیی کوردستان 10یەمین کۆنگرەی خۆی لە هەولێر ببەستێت.

 

زانیاریی تایبەت: هەموو شتێک پێش کۆنگرە یەکلایی دەکرێتەوە، واتە پەیڕەو و پرۆگرام دادەنرێت و لە کۆنگرەدا ناخوێنرێنەوە و تەنیا دەنگیان لەسەر دەدرێت، هەروەها ئەو بڕگەیەی پەیڕەوەکە لابراوە کە باس لەوە دەکات کەسێک بۆی هەیە تەنیا دوو خول بۆ پۆستی ئەمیندار خۆی کاندید بکات.

 

ژمارەکان وا دەڵێن: ئەندامانی کۆنگرە لە هەزار و 200 کەس بۆ 700 کەس کەمکراونەتەوە.

 

زانیاریی بەدەستهاتوو: لەم کۆنگرەیەدا سەڵاحەدین بەهادین، ئەبوبەکر کاروانی، محەممەد ئەحمەد، محەممەد ڕەئوف، خۆیان بۆ پۆستی ئەمینداریی گشتیی کاندید دەکەن، هەریەک لە محەممەد ئەحمەد و محەممەد ڕەئوف کاندیدی لاوەکین، ئەبوبەکر کاروانی ڕکابەری سەرەکییە بۆ وەرگرتنی پۆستی ئەمینداری گشتی، بەڵام  لەبەرئەوەی بەشێکی زۆر لە لایەنگرانی نەیانتوانیوە لە کۆنفرانسەکاندا دەربچن و بچنە کۆنگرە، بە ئەگەری زۆر ئەبوبەکر کاروانیش لە ڕکابەرییەکە دەکشێتەوە.

 

ئەوەی پێویستە بیزانیت: هەر ژنێک بەشداری نەکردبێت لە خوێندنی وانەی خێزانی "ئوسرە"، ئەوا ناتوانێت بۆ پۆستی ئەمینداری گشتیی خۆی کاندید بکات، بۆیە بۆ ئەم کۆنگرەیەش هیچ ژنێک ناتوانێت خۆی بۆ ئەو پۆستە کاندید بکات.