نەمامەکانی باکووری کوردستان ژینگەی دهۆک دەڕازێننەوە

ئاڤا نیوز

 

گرنگیدان بە سەوزایی لە کارە پێشینەکانی حکومەتی هەرێمی کوردستانە، لە کابینەی نۆیەمدا چەندین هەڵمەتی نەمام چاندن و بەردی بناغەی پارک لە بەشێک لە شار و شارۆچکەکانی هەرێمی کوردستان دانرا.

 

وێنە گەورەکە: لە هەڵمەتێکی نەمام چاندن لە شوێنە گشتییەکانی پارێزگای دهۆک 40 هەزار و 600 نەمامی جۆراو جۆر چێنران.

 

لێدوانی فەرمی: ئیسماعیل مستەفا، بەرپرسی ڕاگەیاندنی شارەوانی دهۆک، بە ئاڤا نیوزی ڕاگەیاند، نەمامەکان بەهاوکاری باڵیۆزی تورکیا لە عێراق و کونسوڵی تورکیا لە هەرێمی کوردستان لە شاری ئامەدی باکووری کوردستان دابینکراون و هێنراون بۆ پارێزگای دهۆک، کە بریتین لە داری کاژا و داری گوێز و چەندین جۆری دیکەی دار، کە بە سەوزبوونیان دیمەنێکی جوان و ژینگەیەکی پاک بە شاری دهۆک دەبەخشن، لەبەرئەوەی ئاوهەوای پارێزگای دهۆک گونجاوە.

 

بۆچی گرنکە: بەهۆی چاندنی ئەم ژمارە نەمامە ڕێژەی سەوزایی زیاتر دەبێت، ئەمەش دەبێتە هۆی پاکتر بوونی ژینگە و سوودی تەندورستی بە هاووڵاتییان دەگەیێنێت.