بافڵ تاڵەبانی: یەکێتی بە وردیی چاودێریی بارودۆخی سووریا دەکات

ئاڤا نیوز

 

بافڵ جەلال تاڵەبانی، سەرۆکی یەکێتیی نیشتمانیی کوردستان لە میانەی کۆبوونەوەی لەگەڵ کونسوڵی گشتیی ئەمریکا باسی بارودۆخی ئێستای سووریای کرد و دەڵێت، بە وردی چاودێریی دۆخەکە دەکەین.

 

وێنە گەورەکە: بەرەبەیانی ڕۆژی یەکشەممە 8-12-2024، دیمەشقی پایتەختی سووریا کەوتە ژێر دەسەڵاتی هێزەکانی ئۆپۆزیسیۆنی سووریا و کۆتایی بە دەسەڵاتی 53 ساڵەی ئەسەد هات. لەمبارەیەوە سەرۆکی یەکێتیی نیشتمانیی کوردستان لە کۆبوونەوەی لەگەڵ  کونسوڵی گشتیی ئەمریکا تاوتوێی دۆخی سووریایان کرد.

 

لێدوانی فەرمی: بافڵ جەلال تاڵەبانی لە دیدارەکەدا ئاماژەی بە پێویستیی پەلەکردن لە پێکهێنانی کابینەی نوێی حکومەتی هەرێمی کوردستان کرد و ڕایگەیاند، پێویستە حکومەتی نوێ لەسەر بنەمای هاوسەنگی و دادپەروەری پێکبهێنرێت و ڕەنگدانەوەی خواستی هەموولایەک بێت، بە کارنامەیەکی بەهێز و دوور لە دەستێوەردانی حزبییەوە خزمەتی هەموو لایەک بکات و کارەکانی لەپێناو ئاوەدانیی کوردستان و دەستەبەرکردنی ژیانێکی شایستەتردا بێت.

 

لە دیدارەکەی سەرۆکی یەکێتی و کونسوڵی گشتیی ئەمریکادا، دۆخی ڕۆژهەڵاتی ناوەڕاست، بەتایبەت سووریا گفتوگۆی لەبارەوەکرا. بافڵ جەلال تاڵەبانی رایگەیاند، یەکێتی بە وردیی چاودێریی ڕووداو و پێشهاتەکان دەکات، بڕوایانوایە پێویستە هەموو لایەک بەرپرسیارانە مامەڵە لەگەڵ دۆخەکە بکەن و هەنگاو بەرەو قۆناغی داهاتوو بنێن.

 

لەلایەکی دیکەوە: هەردوولا گفتوگۆیان لەبارەی دۆخی هەرێمی کوردستان، عێراق و ناوچەکە کرد و جەختیان لە یەکخستنی هەوڵەکان بە ئاراستەی سەرخستنی پرۆسەی سیاسی و پێشکەشکردنی خزمەتگوزاریی زیاتر کردەوە.