سۆراغی هاووڵاتییەكی دیكەی باشووری كوردستان لە زیندانەكانی سووریا ئاشكرا دەبێت

ئاڤا نیوز

 

هاووڵاتییەكی كوردی دانیشتووی گوندی سەری كارێزی شارۆچكەی زووممار دوای 10 ساڵ لە ڕفاندنی لەلایەن چەكدرانی داعشەوە، سۆراغی ئاشكرا دەبێت، دەگوترێت یەكێكە لە زیندانییە ئازادكراوەكانی سووریا.

 

چیرۆكی سەرەكی: ئەحمەد عەزیز ئەحمەد، لەدایكبووی ساڵی 1949ـیە و هاووڵاتییەكی كوردی خەڵكی شارۆچكەی زووممارە، ساڵی 2014 لە كاتی هێرشی چەكدارانی رێكخراوی تیرۆریستیی داعش بۆ ناوچەكە، لەلایەن چەكدارانی ڕێكخراوەكەوە لەگەڵ دوو كوڕ و دوو برازای دەڕفێندرێت و تاوەكو ئێستا بێسەروشوێنن.

 

زانیاریی زیاتر: ئەحمەد عەزیز، كادیری پارتی دیموكراتی كوردستان بووە و دوو كوڕەكەشی پۆلیس بوونە لە پۆلیسی فیدراڵیی عێراق و برازاكانیشی كاسبكار بوونە.

 

لێدوانی فەرمی: فەیسەڵ كوڕی ئەحمەد عەزیزە و بە ئاڤا نیوزی ڕاگەیاند: ئەمڕۆ لەڕێگەی تۆڕە كۆمەڵایەتییەكانەوە هەواڵی ئەوەمان بەدەست گەیشتووە كە باوكم زیندووە و تاوەكو ئێستا لە زیندانەكانی سووریا زیندان بووە، ئێستاش یەكێكە لە زیندانییە ڕزگاربووەكان.

 

بەپێی گوتەی فەیسەڵ ئەحمەد، باوكی لە كاتی ڕزگاربوونی لە زیندانێكی سووریا ناوی خۆی بە چەند شایەدحاڵێك گوتووە و گوتویەتی "من كوردم و ڕفێنراوم و چەند ساڵێكە لە زیندانم".

 

ئەوەی پێویستە بیزانیت: دوای ڕفاندنی ئەو هاووڵاتییە كوردانە، خانەوادەكانیان هەواڵی ئەوەیان بەدەست گەیشتووە كە بەرەو وڵاتی سووریا ڕفێندراون و پاشان هیچ هەواڵێكیان لە ڕفێندراوەكان نەبووە.