هەفتەی داهاتوو كاتی دابەشكردنی پارەی كارمەندانی سەر سندووق ڕادەگەیێنرێت

ئاڤا نیوز

 

دوای پەسەندكردنی ئەنجامی كۆتایی هەڵبژاردنی پەرلەمانی كوردستان لەلایەن كۆمسیۆنی باڵای هەڵبژاردنەكانی عێراق، سەرجەم وردبینییەكان بۆ دابەشكردنی پارەی كارمەندانی سەر سندووق تەواوكراون و تەنیا گواستنەوەی پارەكە بۆ بانكەكانی هەرێمی كوردستان ماوە.

 

وێنە گەورەكە: ڕۆژی 20ـی ئۆكتۆبەر دەنگدانی گشتیی هەڵبژاردنی خولی شەشەمی پەرلەمانی كوردستان بەڕێوەچوو كە سەرووی 41 هەزار كارمەند لە فەرمانبەرانی حكومی و دەرچووی زانكۆ و پەیمانگەكان بۆ بەڕێوەبردنی پرۆسەی دەنگدان، گرێبەستیان لەگەڵ كرابوو.

 

لێدوانی فەرمی: نەبەرد عومەر، بەرپرسی دەستەی هەڵبژاردنەکانی هەرێمی كوردستان لە کۆمیسیۆنی باڵای سەربەخۆی هەڵبژاردنەکانی عێراق تایبەت بە ئاڤا میدیا ڕایگەیاند، "هەموو ئامادەکارییەکان بۆ خەرجكردنی پارەكە تەواو بوون، تەنیا ماوە سیولە لە بانکی عێراقەوە بگوازرێتەوە بۆ بانکەکانی هەرێمی کوردستان و لە هەفتەی داهاتوودا کاتی دابەشکردنی شایستە داراییەکانی كارمەندانی سەر سندوق رادەگەیێنین".

 

ئەوەی پێویستە بیزانیت: هەر كارمەندێكی سەر سندوق ئەگەر فەرمانبەری حكومی بێت بڕی 150 هەزار دینار و دەرچووانی زانكۆ و پەیمانگە 250 هەزاریان وەك پاداشتی كاركردنیان پێدەدرێت.