بەغدا 430 ملیارەکەی بۆ پڕکردنەوەی کورتهێنانی مووچە نارد

ئاڤا نیوز 

 

وەزارەتی دارایی عێراق بڕی 430 ملیار دیناری بۆ پڕکردنەوەی کورتهێنانی مووچە خستە سەر هەژماری بانکی وەزارەتی دارایی و ئابووریی حکومەتی هەرێمی کوردستان. ئەم بڕە پارەیە بەشی کورتهێنانی مووچەی مانگەکانی 10 و 11 دەکات.

 

وێنە گەورەکە: لە ماوەی دوو هەفتەی ڕابردوو بەغدا بڕی 761 ملیار دیناری بۆ مووچەی مانگی 10 ناردووە، بەڵام بەهۆی هەبوونی کورتهێنان هەرێمی کوردستان ئامادە نەبوو وەریبگرێت. دوای هەوڵەکانی سەرۆکوەزیران مەسرور بارزانی، بەغدا بڕیاری دا ئەم بڕە پارەیە بۆ پڕکردنەوەی کورتهێنان بنێرێت. 

 

زانیاریی بەدەستهاتوو: سەرچاوەیەک لە لقی هەولێری بانکی ناوەندیی عێراق بە ئاڤا نیوزی ڕاگەیاند، بەغدا بڕی 430 ملیار دیناری خستووەتە سەر هەژماری وەزارەتی دارایی هەرێمی کوردستان. 

 

ئەوەش بزانە: بڕیارە ئەمڕۆ دوای کۆبوونەوەی ئەنجوومەنی وەزیرانی هەرێمی کوردستان، وەزارەتی دارایی لیستی مووچەی مانگی 10 بڵاو بکاتەوە و لە چەند ڕۆژی داهاتوودا مووچە دابەش بکرێت.