شاندێکی باڵای حکومەتی هەرێمی کوردستان بۆ پرسی بودجە سەردانی بەغدا دەکات

ئاڤا نیوز

 

لە عێراق هەنگاو بۆ پرسی هەموارکردنەوەی بودجەی گشتی و ساڵی دارایی 2025 دەنرێت و لە کۆبوونەوەی ئەنجوومەنی وەزیرانی هەرێمی کوردستان بڕیاردرا شاندێکی باڵا بۆ گفتوگۆکردن لەسەر ئەو پرسە سەردانی بەغدا بکات.

 

وێنە گەورەکە: چەند ڕۆژێکە شاندێکی باڵای حکومەتی هەرێمی کوردستان لەگەڵ ڕێباز حەملان، بریکاری وەزیری دارایی عێراق لەگفتوگۆ و بەدواداچوونی بەردەوامدان تاوەکو بگەنە بنەمایەکی هاوبەش لەسەر ڕێگەگرتن لەو کێشە و گرفتانەی ساڵی 2024 کە بۆ پشکی بودجەی هەرێمی کوردستان دروستبوو، تا لە بودجەی ساڵی 2025 دووبارە نەبنەوە و گرەنتی مافە داراییەکانی هەرێمی کوردستان بکرێت.

 

ڕاگەیێنراوی فەرمی: لە کۆبوونەوەی ئەمڕۆ چوارشەممە، ئەنجوومەنی وەزیرانی هەرێمی کوردستان بڕیاردرا هەفتەی داهاتوو شاندی حکومەتی هەرێمی کوردستان، بۆ بەدواداچوونی پرسی هەموارکردنەوەی بودجەی گشتیی فیدراڵ و خشتە داراییەکانی هاوپێچی یاساکە بۆ ساڵی دارایی 2025 سەردانی بەغدا بکات.

 

ئەمەش بزانە: پڕۆژە یاسای بودجەی ساڵی 2025 دەچێتە پەرلەمانی عێراق و هەمواری بڕگەکانی دەکرێت، حکومەتی هەرێمی کوردستان دەیەوێت بەشە بودجەی هەرێمی کوردستان و گەرەنتیکردنی مووچەی مووچەخۆران، تێچووی دەرهێنان و گواستنەوەی نەوت و سەرجەم شایستە داراییەکانی دیکە لە هەمواری بودجەی ساڵی داهاتوو زامن بکات.