دوایین زانیاریی لەسەر دابەشکردنی 21 هەزار یەکەی نیشتەجێبوونی دەستەی وەبەرهێنان

ئاڤا نیوز

 

زیاتر لە 119 هەزار کەس فۆڕمی وەرگرتنی 21 هەزار شووقەکەی پڕکردووەتەوە، ئێستا دەستەی وەبەرهێنان سەرقاڵی کۆکردنەوەی دەرخستەی وەبەرهێنەرەکانە، دواتر لیژنەیەکی باڵا پێکدەهێنرێت و ئەو دەرخستەیەی کە لەگەڵ داواکاری دەستەی وەبەرهێنان و گوزەرانی هاووڵاتیان گونجاو بێت، هەڵدەبژێردرێت و دەست بەکارەکەی دەکات.

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤای ڕاگەیاند، "لەگەڵ دەستپێکی کابینەی دەیەمی حکومەتی هەرێمی کوردستان، هەڵبژاردنی وەبەرهێنەری گونجاو، بوونیادنانی یەکەکان و  هەڵاوێرکردنی ناوەکان لە سەرجەم پارێزگا و ئیدارە سەربەخۆکان دەستپێدەکات، پشکی سەرجەم ناوچەکان دیاریکراوە."

 

شێوازی جێبەجێکردن: شێوازی دابەشکردنی ئەو یەکانە و دیاریکردنی پشکی پارێزگا و ئیدارە سەربەخۆکان بەگوێرەی ژمارە و ڕێژەی دانیشتووان و کەسانی کەمدەرامەت دەبێت، مەرجە ماوەی پێدانی قستەکان بۆ ماوەی 15 ساڵ بێت، بۆ ئەوەی لەگەڵ گوزەرانی هاووڵاتیان یەکبگرێتەوە.

 

زانیاریی زیاتر: لەو 21 هەزارە پشکی تایبەت بۆ خێزانە کریستیانەکان دابینکراوە، هەزار یەکەی نیشتەجێبوون بۆ کریستیانەکانی سنووری قەزای عەنکاوە  دروستدەکرێن، ماوەیەک پێش  ئێستا سەرۆکوەزیران مەسرور بارزانی بەردی بناغەی پڕۆژەکەی دانا و  پڕۆژەکە لە جێبەجێکردندایە.