وەزیری بەرگریی ئەڵمانیا: هێزەكانمان لە هەرێمی كوردستان لە ئەرک بەردەوام دەبن

ئاڤا نیوز 

 

وەزیری بەرگریی ئەڵمانیا بە سەردانێک گەیشتە هەولێری پایتەختی هەرێمی كوردستان و لە كۆبوونەوەیەكیدا لەگەڵ سەرۆكی هەرێمی كوردستان جەختی لەسەر پابەندی وڵاتەکەی بۆ بەردەوامیی پشتگیری و فراوانکردنی هاریکاریی هاوبەشی لەگەڵ عێراق و هەرێمی کوردستان لە هەموو بوارەکاندا کردەوە.

 

وێنە گەورەكە: ڕۆژی پێنجشه‌ممه 2024-12-12 نێچیرڤان بارزانی، سەرۆکی هەرێمی کوردستان، پێشوازی له‌ بۆریس پیستۆریوس، وەزیری بەرگریی ئەڵمانیا و شاندێکی یاوەری کرد کە لە ژمارەیەک ئەندامی پەرلەمانی فیدراڵی ئەڵمانیا و بەرپرسانی سەربازی و دیپلۆماتکاران، پێکهاتبوو.

 

زانیاریی زیاتر: لە كۆبوونەوەی سەرۆكی هەرێمی كوردستان و وەزیری بەرگریی ئەڵمانیا، هەریەك لە جه‌عفه‌ر شێخ مسته‌فا جێگرى سه‌رۆكی هەرێمی كوردستان و شۆڕش ئیسماعیل، وه‌زيرى پێشمه‌رگه‌ و سوپاسالارى پێشمه‌رگه‌ و باڵيۆزى ئه‌ڵمانيا له‌ عێراق و نوێنه‌رى حكومه‌تى هه‌رێمى كوردستان له‌ ئه‌ڵمانيا ئاماده‌ى بوون.

 

ڕاگەیێنراوی فەرمی: سەرۆکایەتیی هەرێمی کوردستان ناوەڕۆکی کۆبوونەوەکەی خستەڕوو و ڕایگەیاند: نێچیرڤان بارزانی سوپاس و پێزانینی هەرێمی کوردستانی بۆ پشتگیریی بەردەوامی ئەڵمانیا لە عێراق و هەرێمی کوردستان لە هه‌موو بوارەکاندا دووپات کردەوە، به‌تايبه‌تى ستايشى ڕۆڵی ئەڵمانیای لە پشتیوانیکردنی عێراق و هه‌رێمى كوردستان لە شەڕی دژی داعشدا كرد، هاوكات هاوكاريى‌ هێزه‌كانى ئه‌ڵمانياى له‌ پرۆسه‌ى يه‌كخستنه‌وه‌ى پێشمه‌رگه‌ و يارمه‌تييه‌كانى ئه‌ڵمانياى بۆ پێكهاته‌كان، به‌تايبه‌تى ئێزدييان بەرز نرخاند.

 

لەلایەكی دیكەوە: وەزیری بەرگریی ئەڵمانیا جەختی لەسەر پابەندی وڵاتەکەی بۆ بەردەوامیی پشتگیری و فراوانکردنی هاریکاریی هاوبەشی لەگەڵ عێراق و هەرێمی کوردستان لە هەموو بوارەکاندا کردەوە. هه‌روه‌ها خۆشحاڵيى خۆى به‌ ئه‌ركى هێزه‌كانيان له‌ هه‌رێمى كوردستان نيشان دا و دووپاتى كرده‌وه‌ كه‌ به‌رده‌وام ده‌بن.

 

ئەمەش بزانە: هەڵبژاردنی پەرلەمانی کوردستان و هەوڵەکان بۆ پێکهێنانی حکوومەتی نوێ، په‌يوه‌ندييه‌كانى هه‌ولێر ـ به‌غدا و چەند پرسێکی جێی بایەخی هاوبەش، دوایین پێشهاتەکانی دۆخی سووريا، کاریگەری و لێکەوتەکانی لەسەر ئەرک و چالاکیی هێزەکانی هاوپەیمانیی نێودەوڵەتیی دژی داعش و دۆخی گشتیی عێراق، تاوتوێ کران، تەوەری دیکەی کۆبوونەوەکە بوون.