دەستنیشانکردنی بەغدا وەک پایتەختی گەشتیاری عەرەبی کاردانەوەی لێدەکەوێتەوە

ئاڤا نیوز

 

هەڵبژاردنی بەغدا وەک پایتەختی گەشتوگوزاری وڵاتانی عەرەبی بۆ ساڵی 2025 ، کاردانەوەی بەشێک لە هاووڵاتییانی پایتەختی لێدەکەوێتەوە.

 

چیرۆكی سه‌ره‌كی: ڕێکخراوی گەشتوگوزاری عەرەبی سێشەممەی ڕابردوو، بەغدای وەک پایتەختی گەشتیاری عەرەبی بۆ ساڵی 2025 هەڵبژارد، بەپێی هەڵسەنگاندنی ئەو ڕێکخراوە بەغدا پێشەنگی پایتەختی وڵاتانی عەرەبی بووە لە بەڕێوەبردنی گەشتیاری، ژێرخانی گەشتیاری، سەرچاوەکانی گەشتیاری، پاراستنی ژینگە و ئاسایش و سەقامگیری.

 

لێدوانی فەرمی: بەشێک لە هاووڵاتییانی شاری بەغدا بەئاڤا میدیایان گوت: خۆشحاڵین بەغدا دیاری دەکرێت وەک پایتەختی گەشتیاری عەرەبی، بەڵام لە ڕاستیدا تاوەکو ئێستا ئامادەکاری بۆ ئەم نازناوە نەکراوە و کاتێک گەشتیاران لە دەرەوەی وڵات دێن و سەردانی بەغدا دەکەن بۆ ئەم مەبەستە و پێچەوانەکەی دەبینن، ڕەنگدانەوەی نەرێنی دەبێت لە سەر بڕیارەکە.

 

لەلایەکی دیکەوە: چەند ڕێکخراوێکی مەدەنی لە بەغدا ئاماژە بەوەدەکەن، زۆر بابەت هەن ڕێگرن لەوەی بەغدا ئەو نازناوە گەورەیە وەربگرێت ئەمەش بەهۆی کێشەی کەمی خزمەتگوزاری، کێشەی ئەمنی لەهەندێک ناوچەدا و پیسی ژینگەکەی .

 

باكگراوند: پێشتر بەرپرسانی حکومەتی عێراق ڕایەنگەیاندووە، بەغدا خاوەنی میراتی شارستانی و كەلتورییە و بە یەکێک لە پایتەختە بەناوبانگەکانی جیهان  دادەنرێت.