بلینکن لەبارەی ئێرانەوە داوایەک لە سوودانی دەکات

ئاڤا نیوز

 

ڕۆژنامەیەکی ئەمریکی وردەکاری سەردانەکەی وەزیری دەرەوەی ئەمریکا و کۆبوونەوەی لەگەڵ سەرۆکوەزیرانی عێراق بڵاوکردەوە، کە تیایدا بلینکن لەبارەی ئێرانەوە داوایەکی لە سوودانی کردووە.

 

وێنە گەورەکە: لەمیانی گەشتەکەیدا بۆ ڕۆژهەڵاتی ناوەڕاست، ڕێککەوتنی 2024\12\14 ئەنتۆنی بلینکن، وەزیری دەرەوەی ئەمریکا بەسەردانێکی ڕانەگەیێەندراو گەیشتە بەغدای پایتەخت و لەگەڵ محەممەد شیاع سوودانی، سەرۆکوەزیرانی عێراق کۆبووەوە، لە کۆبوونەوەکەدا هەردوولا تاوتوێی پێشهاتەکانی سووریایان لە دوای ڕوخانی دەسەڵاتی بەشار ئەسەد کرد.

 

زانیاریی بەدەستهاتوو: ڕۆژنامەی بلومبێرگی ئەمریکی لە زاری بەرپرسێکی ئەمریکییەوە بڵاویکردەوە: بلینکن داوای لە سودانی کردووە ڕێگری لە ئێران بکات چەک و کەرەستەی سەربازیی لە ڕێگەی عێراقەوە بۆ سووریا بنێرێت، چونکە دەکرێت ئەو چەکانە لەلایەن میلیشیاکانی سەر بە ئێرانەوە بەکاربهێنرێت بۆ تێکدانی سەقامگیری ئەو وڵاتە.

 

زانیاریی زیاتر: ڕۆژنامەکە ئاماژەی بەوەشکرد، بلینکن داوای لە سوودانی کردووە ڕێوشوێنی توند بەرامبەر بە میلیشیاکان بگرێتەبەر و ڕێگرییان لێبکات بۆ هێرشکردنە سەر هێزەکانی وڵاتەکەی لە عێراق.

 

ئەمەش بزانە: بلینکن بەر لە عێراق، سەردانی تورکیا و ئوردنی کردبوو و لەوێش لەگەڵ بەرپرسانی باڵای هەردوو وڵات دۆخی سووریای تاوتوێ کرد.