ئەمریکا و کوێت داوا لە عێراق دەکەن ڕێز لە ڕێککەوتنە نێودەوڵەتییەکان بگرێت

ئاڤا نیوز

 

هەریەک لە ئەمریکا و کوێت داوا لە عێراق دەکەن ڕێز لە ڕێککەوتنە نێودەوڵەتییەکان و بڕیارەکانی نەتەوەیەکگرتووەکان بگرێت، بەتایبەت بڕیاری 833 ی ئەنجوومەنی ئاسایش سەبارەت بە دیاریکردنی سنوور.

وێنە گەورەکە: دوای داگیرکردنی کوێت لە ساڵی 1990 لەلایەن سوپای پێشووی عێراق. ئەنجوومەنی ئاسایشی نێودەوڵەتی لە ڕێگەی لیژنەیەكەوە سنوورە وشکانی و ئاوییەکانی نێوان هەردوو وڵاتی دیاریکرد و عێراق پابەندبوونی خۆی بە بڕیارەكانی لیژنەكە ڕاگەیاند، ساڵی 1993 لیژنەكە بڕیاری ژمارە 833ـی لەوبارەیەوە ڕاگەیاند، هەردوو وڵاتیش پابەندبوونی خۆیان بە بڕیارەکە ڕاگەیاند.

 

زانیاریی زیاتر: ئەمریکا و کوێت شەشەمین گەڕی دیالۆگی ستراتیژییان لە ڕۆژانی 9 تا 11ـی کانوونی یەکەمی 2024 بە شێوەی ئۆنلاین ئەنجامدا و دواتر ڕاگەیێنراوێکیان بڵاوکردەوە.

 

ڕاگەیێنراوەکەی وەزارەتی دەرەوەی ئەمریکا دوای ئەنجامدانی دیالۆگەکە:

 

 - ئەمریکا و کوێت جەخت لەسەر گرنگی بەهێزکردنی هاوبەشی مێژوویی و ستراتیژی نێوانیانیان دەکەنەوە، پابەندبوونی واشنتن بە ئاسایشی کوێت و پەرەپێدانی هاوکاریی لە بوارەکانی بەرگریی، ئاسایشی ئەلیکترۆنی، بازرگانی، وەبەرهێنان و بوارەکانی تر جەختی لەسەر کرایەوە.

- هەردوو وڵات جەختیان لەسەر گرنگی پابەندبوونی عێراق بە سەروەریی کوێت و یەکپارچەیی خاکی کوێت و ڕێزگرتن لە پەیماننامە نێودەوڵەتییەکان و بڕیارەکانی نەتەوە یەکگرتووەکان بەتایبەتی بڕیاری 833 ی ئەنجوومەنی ئاسایش سەبارەت بە دیاریکردنی سنوور کردەوە.

- هەردوولا داوایان کرد که دیاریکردنی سنووری دەریایی نێوان کوێت و عێراق دوای دیاریکردنی سنووری 162 بە گوێرەی یاسای نێودەوڵەتی و ڕێکەوتننامەی نەتەوەیەکگرتووەکان بۆ یاسای دەریاکان لە ساڵی 1982دا بەردەوام بکرێت.

 - هەردوولا داوایان لە بەغدا کرد دڵنیایی بدات لە بەردەوامی ڕێککەوتنی 2012ـی کوێت و عێراق بۆ ڕێکخستنی گەشتی دەریایی لە بەندەری خور عەبدوڵڵا.

 

ئەوەی پێویستە بیزانیت: دوای داگیرکردنی کوێت لەلایەن عێراقەوە لە ساڵی 1990، عێراق 13 ساڵ گەمارۆی ئابووری بەسەردا سەپێنرا و ناچار بوو لە ڕێگەی نەتەوەیەکگرتووەکانەوە قەرەبووی کوێت بکاتەوە. تا ساڵی 2021، بەغدا بە زیاتر لە 52 ملیار دۆلار قەرەبووی کوێتی کردەوە.