لیستی مووچەی مانگی 10 بڵاودەکرێتەوە

ئاڤا نیوز

 

بڕیارە لە چەند کاتژمێری داهاتوودا، واتە ئەمشەو یان سبەی دووشەممە لیستی مووچەی مانگی 10 بڵاوبکرێتەوە و لە چەند ڕۆژێکی کەمدا سەرجەم مووچەخۆران مووچە وەربگرن.

 

وێنە گەورەکە: دوای نزیکەی دوو مانگ لە دابەشنەکردنی مووچە و چوونی شاندێکی حکومەتی هەرێمی کوردستان بۆ بەغدا، ئەم هەفتەیە دەست بە دابەشکردنی مووچەی مانگی 10 دەکرێت و بڕیارە هەفتەی داهاتوو مووچەی مانگی 11 ەش دابەش بکرێت.

 

لێدوانی فەرمی: حکومەتی هەرێمی کوردستان دوای تەواوبوونی کۆبوونەوەی شاندی کوردستان و وەزارەتی دارایی عێراق ڕایگەیاند، ئەم سێشەممەیە 17ی مانگ دەست بە دابەشکردنی مووچەی مانگی 10 دەکرێت. سەرچاوەیەکی باڵاش لە وەزارەتی دارایی و ئابووریی هەرێمی کوردستان بە ئاڤا نیوزی گوت، ئەمشەو یان سبەی لیستی مووچە بڵاودەکرێتەوە.

بەگوتەی سەرچاوەکە، وەزارەتی دارایی سەرقاڵی ئامادەکردنی لیستی مووچەیە و ئەمشەو تەواو دەبێت، بۆ ڕاگەیاندنیشی چاوەڕوانی گەڕانەوەی شاندەکەن بۆ هەولێر. بەپێی زانیارییەکانی ئاڤا هەر ئەمشەو شاندەکە دەگەڕێتەوە.

 

باکگراوند: ئەمڕۆ یەکشەممە شاندێکی هەرێمی کوردستان کە پێکهاتبوو لە ئاوات شێخ جەناب، وەزیری دارایی و ئابووری، د.ئومێد سەباح، سەرۆکی دیوانی ئەنجوومەنی وەزیران و ژمارەیەک ئەندامی دیکە،  تا لەبارەی مووچەی مانگەکانی 10 و 11 و 12 لەگەڵ تەیف سامی، وەزیری دارایی عێراق لەبارەی مووچە و بودجە کۆبوونەوە.

ئەوەی پێویستە بیزانیت: لە کۆبوونەوەکەدا بڕیار درا دەست بە دابەشکردنی مووچەی مانگی 10 بکرێت و حکومەتی هەرێمی کوردستان بە داهاتی ناوخۆ کورتهێنان پڕبکاتەوە. بەزووترین کاتیش مووچەی مانگی 11 و 430 ملیار دینارەکە بۆ پڕکردنەوەی کورتهێنان بنێرێت. لەبارەی مووچەی مانگی 12 ەش دەبێت وەزارەتی دارایی هەرێمی کوردستان سەرجەم گرفتە تەکنیکییەکانی لیستی مووچە چارەسەر بکات ئینجا دەنێردرێت.