ئیسرائیل باڵیۆزخانەی لە ئێرلەندا داخست

ئاڤا نیوز

بەهۆی خراپی مامەڵەکانی ئێرلەندا لەگەڵ ئیسرائیل و پەیوەندییە ئاڵۆزەکان لە نێوان هەردولا ئیسرائیل سەرجەم کارەکانی هەڵپەسارد و باڵیۆزخانەکەشی داخست.

 

وێنە گەورەکە: "هەر لەسەرەتای سەرهەڵدانی ئاڵۆزییەکانی نێوان سوپای ئیسرائیل و بزووتنەوەی حەماس لە کەرتی غەززە ئاڵۆزییەکی زۆر دروست بوو لە نێوان ئیسرائیل و حکوومەتی ئێرلەندا، ئەمەش بووە هۆی ئەوەی ئیسرائیل سەرجەم پەیوەندییە دیپلۆماسییەکانی لەگەل ئەو وڵاتە هەڵپەسێرێت وباڵیوزخانەکەشی دابخات.

 

لێدوانی فەرمی: وەزارەتی دەرەوەی ئیسرائیل ڕۆژی یەکشەممە ڕایگەیاند: "باڵیۆزخانەی وڵاتەکەی لە ئێرلەندا دادەخات  بە ئاماژەدان بە "سیاسەتە توندڕەوەکانی ئەو وڵاتە دژ بە ئیسرائیل" و گوتیشی "حکومەتی دبلن، پەیوەندییە ئاڵۆزەکانی نێوان هەردوو وڵات زیاتر ئاڵۆز دەکات".

 

ڕاگەیێنراوی فەرمی: گیدۆن سار، وەزیری دەرەوەی ئیسرائیل لە بەیاننامەیەکدا ڕایگەیاندووە، "ئەو کردەو و قسە دژە جووانەی کە ئێرلەندا دژی ئیسرائیل بەکاریدەهێنن، ڕەگ و ڕیشەی لە بێ شەرعیەتدان و شەیتانکردنی دەوڵەتی جوودا هەڵەیەکی گەورەیە، هەروەها ئیرلەندا لە پەیوەندییەکانی لەگەڵ ئیسرائیلدا هەموو هێڵێکی سووری بڕیوە".

 

زانیاریی زیاتر: لە مانگی 11ـی ڕابردوودا، سیمۆن هاریس، سەرۆکوەزیرانی ئێرلەندا ڕایگەیاندبوو، ئەگەر بنیامین نەتانیاهۆ، هاوتا ئیسرائیلییەکەی سەفەر بۆ ئێرلەندا بکات دەسەڵاتدارانی وڵاتەکەیان  دەیگرن، دوای ئەوەی دادگای تاوانە نێودەوڵەتییەکان فەرمانی دەستگیرکردنی بۆ دەرکردبوو.

 

ئەمەش بزانە: دادگای نێودەوڵەتیی تاوانەکان فەرمانی دەستگیرکردنی بۆ نەتانیاهۆ و یۆواڤ گالانت، وەزیری پێشووی بەرگریی ئیسڕائیل دەرکرد "بەهۆی تاوانەکانی دژی مرۆڤایەتی و تاوانەکانی جەنگ" کە لە نێوان 8ی 10 ی  2023 و 20ی ئایاری ئەمساڵدا لە کەرتی غەززە ئەنجامدراون.

 

چی ڕوویدا: لە مانگی ئایاردا، دبلن ڕایگەیاندبوو کە فەلەستین وەک "دەوڵەتێکی خاوەن سەروەری و سەربەخۆ" دەناسێنێت کە لە کەرتی غەززە و کەناری ڕۆژئاوا پێکهاتووە و ڕەزامەندی دەربڕیوە لەسەر دامەزراندنی پەیوەندی دیپلۆماسی تەواو لەگەڵی.

 

لەلایەکی دیکەوە: ئیسپانیا و نەرویج لە هەمان ڕۆژدا دانیان بە دەوڵەتیی فەلەستینیدا نا، دوای هەفتەیەک سلۆڤینیا بەدوایدا هات لە مانگی نۆڤەمبەردا، دبلن بۆ یەکەمجار فەڵەستینی وەک دەوڵەتێکی سەربەخۆ قبوڵکرد.