ڕێباز حەملان: کۆبوونەوەی هەولێر و بەغدا لەبارەی مووچەوە ئەرێنی بوو

ئاڤا نیوز

 

شاندی حکومەتی هەرێمی کوردستان بە سەرپەرشتی ئاواتی شێخ جەناب، وەزیری دارایی و ئابووری هەرێمی کوردستان سەردانی بەغدای کرد و لەگەڵ وەزیر و بریکاری وەزارەتی دارایی عێراق لەبارەی پرسی مووچەی سێ مانگەکە کۆبووەوە، کۆبوونەوەکە ئەرێنی بوو و لێکتێگەیشتنی ھاوبەش لەنێوان هەردوولا ھەبوو.

 

وێنە گەورەکە: ئەمڕۆ یەکشەممە 15-12-2024، شاندێکی حکومەتی هەرێمی کوردستان  کە پێکهاتبوو لە ئاوات شێخ جەناب، وەزیری دارایی و ئابووری، د.ئومێد سەباح، سەرۆکی دیوانی ئەنجوومەنی وەزیران و ژمارەیەک ئەندامی دیکە، لەبارەی بودجە و مووچەی مانگەکانی 10 و 11 و 12 لەگەڵ تەیف سامی، وەزیری دارایی عێراق کۆبوونەوە.

 

لێدوانی فەرمی: ڕێباز حەملان، بریکاری وەزارەتی دارایی عێراق ڕایگەیاند: ئەمڕۆ لە بەغداد بەسەرپەرشتی تەيف سامى، وەزیری دارایی عێراق پێشوازیمان لە وەفدێکی باڵای حکومەتی هەرێمی کوردستان کرد.

 

ڕێباز حەملان دەڵێت: لە کۆبوونەوەکەدا تەواوی وردەکاری پاکتاوی دارایی (میزان مراجەعە) و لیستی مووچە و خانەنشینان و خەرجییەکان بۆ ساڵی 2024 باس کرا، هەروەها چارەسەری کێشە هونەرییەکان و بەردەوامبوونی مووچە بە ھەماھەنگی ھەردوو وەزارەتی دارایی جێبەجێ دەکرێن و کۆبوونەوەیەکی ئەرێنی و لێکتێگەیشتنی ھاوبەش ھەبوو.

 

ئەوەی پێویستە بیزانیت: دوای نزیکەی دوو مانگ لە دابەشنەکردنی مووچە و چوونی شاندێکی حکومەتی هەرێمی کوردستان بۆ بەغدا، ئەم هەفتەیە دەست بە دابەشکردنی مووچەی مانگی 10 دەکرێت و بڕیارە هەفتەی داهاتوو مووچەی مانگی 11ـش دابەش بکرێت.