ئیسرائیل ژێرخانی بەرگریی ئاسمانی سووریای کردە ئامانج

ئاڤا نیوز

درەنگانی شەوی ڕابردوو فڕۆکە جەنگییەکانی ئیسرائیل لەڕێگەی ژمارەیەک گورزی ئاسمانییەوە، چەند پێگەیەکی بەرگریی ئاسمانیی لە کەناراوەکانی سووریا کردە ئامانج و ڕوانگەی سووری بۆ مافەکانی مرۆڤ ڕایدەگەیێنێت لە ماوەی 12 ساڵی ڕابردوودا ئەمە بەهێزترین هێرش بووە.

 

وێنە گەورەکە: لەدوای کەوتنی دیمەشق و کەوتنی دەسەڵاتی بەشار ئەسەد، ئیسرائیل جگە لە پێشڕەوییەکانی بۆ نێو خاکی سووریا لە بەرزاییەکانی جۆلانەوە، تاوەکو ئێستا بە دەیان هێرشی ئاسمانیی کردووەتە سەر پێگە سەربازییەکانی سوپای پێشووی ڕژێمی سووریا.

 

زانیاریی بەدەستهاتوو: بەگوێرەی زانیارییەکانی ڕوانگەی سووری بۆ مافەکانی مرۆڤ، درەنگانی شەوی ڕابردوو فڕۆکە جەنگییەکانی ئیسرائیل لە ڕێگەی 18 هێرشی ئاسمانییەوە زیاتر لە 10 پێگەیان لە شاری تەرتووس لە کەناراوەکانی سووریا کردووەتە ئامانج. 

 

زانیاریی زیاتر: هەر بە گوێرەی زانیارییەکانی ڕوانگەی سووری، لە دوای هەڵاتنی بەشار ئەسەدەوە، فڕۆکە ئیسرائیلییەکان زیاتر لە 490 هێرشیان ئەنجامداوە بۆ لەنێوبردنی ژێرخانی سەربازیی سووریا، بەڵام هێرشەکانی ئەمجارەی ئیسرائیل بۆ سەر تەرتووس زۆر بەهێزبوون.