هاکان فیدان: لە پرسی سووریا پلانی پێشوەختەمان لەگەڵ هیچ وڵاتێک نەبووە

ئاڤا نیوز

 

وەزیری دەرەوەی تورکیا ئەوەی ئاشکرا کرد پێشووتر لەگەڵ هیچ گرووپ و هیچ وڵاتێک نە پلان و نە ئامادەکاریی بۆ هێرشەکەی تەحریرولشام  بۆ لادانی دەسەڵاتی بەشار ئەسەد نەکراوە.

 

چیرۆکی سەرەکی: لە دەستپێکی هێرشی چەکدارانی تەحریرولشام و گرووپە چەکدارەکانی ئۆپۆزیسیۆن، تورکیا لەگەڵ ئێران و ڕووسیا لە پەیوەندی بەردەوامدا بووە سەبارەت بەو پێشهاتە، تورکیا بە ئێران و ڕووسیای گوتووە: "ئەم جارەش سیناریۆی ساڵانی 2006، 2016 و 2015 دووبارە مەکەنەوە، بەشار ئەسەد بە هاوکاری ئێوە تا ئێرە هاتووە، ئیتر دەکەوێت و ئێوەش پشتیوانییە سەربازییەکان ڕابگرن".

 

لێدوانی فەرمی: هاکان فیدان سەبارەت بە پێشهاتەکانی سووریا لە دوایین چاوپێکەوتنی تەلەفزیۆنیدا گوتی: "دوای دەستپێکردنی هێرشەکانی تەحریرولشام هەوڵمانداوە بە کەمترین زیان و خوێنڕشتن شەڕەکە کۆتایی بێت، بۆ ئەمەش هەموو هەوڵێکمان دا، بەڵام بەر لەوە هیچ پلان و ئامادەکاریی و ڕێککەوتنێکمان لەگەڵ هیچ گرووپ و وڵاتێک نەبوو".

 

زانیاریی زیاتر: وەزیری دەرەوەی تورکیا باسی لەوەشکرد: ڕووسیا کارەکانی هەڵاتنی ئەسەدیان ڕێکخستووە، تورکیا هیچ ڕۆڵێکی لەم کارەدا نەبوو، دەبێت حکومەتی نوێی سووریا  لە بەرژەوەندی کورد، عەرەب، عەلەوی و کریستیانەکان کاربکات، هەڕەشە نەبێت بۆ سەر وڵاتانی دراوسێی.

 

دەمانەوێت ئیدارەی نوێی سووریا، ئیدارەیەکی مۆدێرن و سەردەمی بێت، هەڵەکانی ئەسەد دووبارە ناکاتەوە، وە ڕێگەش نادەین پەکەکە لەسە بۆڕییە نەوتەکان دابنیشێت و چەند ناوچەیەک بۆخۆی کۆنترۆڵ بکات.