شارەوانی سلێمانی لەبارەی دابەشکردنی زەوی بەسەر فەرمانبەران ڕوونکردنەوە دەدات

ئاڤا نیوز

شارەوانی سلێمانی لەبارەی دابەشکردنی زەوی بەسەر ئەو هاوسەرانەی کە فەرمانبەری حکومین و خزمەتیان وەکو یەکە ڕوونکردنەوە دەدات، وتەبێژی شارەوانی سلێمانی دەڵێت، " ئەگەر پێشتر سودمەند نەبووبن زەویان پێ دەدرێت".
 
چیرۆکی سەرەکی: دوو هاوسەر لە پارێزگای سلێمانی کە 32 ساڵە مامۆستان، پەیوەندیان بە ئاڤاوە کرد، داوایان کرد کە بەدواداچوونیان بۆ پرسی دابەشکردنی زەوی و سودمەندبوونیان لە بڕیارەکەی حکومەتی هەرێمی کوردستان بۆ بکرێت، ئاڤا لەو بارەیەوە بەدواداچوونی بۆ کردن.

 

لێدوانی فەرمی: زەردەشت ڕەفیق، وتەبێژی سەرۆکایەتی شارەوانی سلێمانی، لەوبارەیەوە، بە ئاڤا میدیای ڕاگەیاند: ئەگەر دوای هاوسەرگیری لە وەرگرتنی خانوو و شتی دیکە سوودمەند بووبن، ئەوا پرۆسەی دابەشکردنی زەوی نایانگرێتەوە، بەڵام پێش هاوسەرگیری هەریەک لەوانە سوودمەند بووبێت ئاساییە و پرۆسەکەی ئێستا دەیانگرێتەوە.

 

وتەبێژی شارەوانی سلێمانی، باسی لەوەشکرد: چاوەڕوانی وەزارەتە پەیوەندیدارەکانین بۆ ئەوەی ناوی فەرمانبەرانمان بۆ بنێرن تاوەکو تیروپشکیان بۆ بکەین، چونکە زەوی ئامادەمان هەیە.

 

زانیاریی زیاتر: تاوەکو ئێستا هەزار و 600 زەوی بە یەک قۆناغ بەسەر فەرمانبەرانی سنووری پارێزگای سلێمانی دابەشکراوە.

 

ئەوەی پێویستە بیزانیت: بە بڕیاری سەرۆکوەزیران مەسرور بارزانی، دوای تێپەڕینی 18 ساڵ، پرۆسەی دابەشکردنی زەوی دەستیپێکردەوە، نزیکەی 200 هەزار فەرمانبەر و خانەنشین لە بڕیارەکە سوودمەند دەبن، هەر کەسێک 200 مەتر زەوی پێ دەدرێت.