زانیاری نوێ لەبارەی مووچەی مانگەکانی 11 و 12

ئاڤا نیوز

دوای بڵاوکردنەوەی لیستی مووچەی مانگی 10، بە ئەگەری زۆرەوە ئەمساڵ هیچ مووچەیەکی دیکە دابەش ناکرێت و دابەشکردنی مووچەی مانگەکانی 11 و 12 دەکەوێتە ساڵی داهاتوو.

وێنە گەورەکە: دوای تێپەڕبوونی دوو مانگ بەسەر دابەشکردنی مووچەی مانگی نۆ، سبەی سێشەممە دابەشکردنی مووچەی مانگی 10 بە مووچەی خانەنشینان دەستپێدەکات، شەش ڕۆژ بەردەوام دەبێت و  دووشەممەی داهاتوو بە دابەشکردنی مووچەی ژمارەیەک وەزارەت کۆتایی دێت، دوو ڕۆژ دواتریش پشووی سەری ساڵ دەستپێدەکات.

 

زانیاریی تایبەت: ئاڤا زانیویەتی هیچ ئەگەرێک نییە بتوانرێ تا پێش سەری ساڵ کێشەی هەردوو مووچەی مانگەکانی 11 و 12 چارەسەر بکرێت، بە ئەگەری زۆرەوە هەردوو مووچەکە دەکەونە ساڵی نوێ. ئەگەر فشاریش بکرێت کاریگەری لەسەر ناردنی مووچەی مانگی 12 دەبێت.

باکگراوند: وەزارەتی دارایی و ئابووریی هەرێمی کوردستان ئەمڕۆ لە ڕاگەیێنراوێکدا ڕایگەیاند، مووچەی مانگی 11 کە بڕیاری ناردنی دراوە لەگەڵ 430 ملیار دینارەکە کە بۆ پڕکردنەوەی کورتهێنانی مووچە بڕیارە بنێردرێت، هێشتا نەنێردراون و نەخراونەتە سەر هەژماری بانکی هەرێمی کوردستان.

ئێوارەی دوێنێش وەزارەتی دارایی عێراق لە ڕاگەیێنراوێکدا ڕایگەیاند، لە ئەمڕۆوە {واتە لە دوێنێوە} دەستیان بە خەرجکردنی مووچەی مانگی 11 و 430 ملیارەکە کردووە، بەڵام دوای 24 کاتژمێر هیچ بڕە پارەیەک نەنێردرا. تاوەکو ئێستاش دیار نییە بۆ مانگی 11 چەند دەنێردرێت.

 

گۆشەیەکی دیکە: بڕیارە سبەی سێشەممە هەردوو شاندی پارتی و یەکێتی لە پیرمام کۆببنەوە. سەعدی ئەحمەد پیرە، وتەبێژی یەكێتی دەڵێت: پرسی مووچە تەوەرێكی كۆبوونەوەكە دەبێت، لەكاتێكدا مووچەخۆران چەند مانگێكە مووچەیان وەرنەگرتووە، ئەمەش لێكەوتەی خراپی لەسەر ژیانی خەڵك و دەوامی خوێندنگە و فەرمانگەكان هەیە.