هۆکاری دواکەوتنی کۆنگرەی سەندیکای پارێزەرانی کوردستان ئاشکرا دەبێت

ئاڤا نیوز

 

سەندیکای پارێزەران پێنج ساڵە کۆنگرەی نەبەستووە، نەقیبی سەندیکاکەش هۆکارەکەی بۆ کێشەی یاسایی و سیاسیی دەگێڕێتەوە.

وێنە گەورەکە: هەرچەندە وەزارەتی ناوخۆی حکومەتی هەرێمی کوردستان، بە نووسراو سەرجەم سەندیکا و ڕێکخراوەکانی بۆ بەستنی کۆنگرە ئاگادار کردبووەوە، بەڵام تاوەکو ئێستا ئەو بڕیارە بە هۆکاری جیا جیا جێبەجێ نەکراوە، سەندیکای پارێزەرانی کوردستانیش پێنج ساڵ بەسەر بەستنی کۆنگرەی شەشەمیدا تێپەڕیوە.

 

لێدوانی فەرمی: بەختیار حەیدەر، نەقیبی سەندیکای پارێزەرانی کوردستان بە ئاڤای ڕاگەیاند: هۆکارە سیاسییەکان کاریگەریان لەسەر پرسەکە هەیە، لەلایەکی دیکەش بابەتی یاسایی گرفتی دروست کردووە.

 

بەختیار حەیدەر دەشڵێت، پێشنیازی کۆبوونەوەی ئەنجوومەنم کردووە، بۆ ئەوەی بتوانین هەڵبژاردن بکرێت و کۆنگرەش ببەستین، بەم نزیکانە کۆبوونەوەکە دەکرێت.

 

زانیاریی زیاتر: سەندیکای پارێزەرانی کوردستان یاسای ژمارە 17ی ساڵی 1999ی هەموارکراوی تایبەت بە خۆی هەیە، کە باس لە چۆنییەتی بەستنی کۆنگرە و ڕێکارەکانی دەکات.

 

ئەمەش بزانە: سەندیکای پارێزەرانی کوردستان لە ساڵی 1993 دامەزراوە و تاوەکو ئێستا شەش کۆنگرەی بەستووە، هەروەها سەرجەم پارێزەرانی کوردستان و بەشێک لە پارێزەرانی ناوچە کوردستانییەکانی دەرەوەی هەرێم تێدا ئەندامن.