زیاتر لە 191 هەزار مووچەخۆر لە ڕێگەی هەژماری من مووچە وەردەگرن

ئاڤا نیوز
 
ئەمرۆ دەست بە دابەشکردنی مووچەی مانگی 10 دەکرێت و بەشێکی مووچەخۆران بەشێوازی دیجیتاڵی و لە ڕێگەی هەژماری من مووچەکانیان وەردەگرن.

 

وێنە گەورەکە: هەرێمی کوردستان بەردەوامە لە پتەوکردنی ژێرخانی بە دیجتاڵیکردنی خۆی بە ئامانجی هێنانەکایەی ئاسانکاریی زیاتر بۆ هاووڵاتییانی، لەو چوارچێوەیەشدا حکومەتی هەرێم دەیەوێت سەرجەم مووچەخۆران لە ڕێگەی هەژماری منەوە مووچەکانیان وەربگرن.

 

لێدوانی فەرمی: سەرچاوەیەک لە تیمی هەژماری من بە ئاڤا نیوزی ڕاگەیاند: لە دابەشکردنی مووچەی مانگی 10ی مووچەخۆرانی هەریمی کوردستان، 191 هەزار و 300 مووچەخۆر لەڕێگەی هەژماری من مووچەکانیان وەردەگرن.

 

زانیاریی زیاتر: بەپێی دوایین داتای تیمی هەژماری من، 156 هەزار فەرمانبەری مەدەنی، 35 هەزار و 300 پێشمەرگە لەڕێگەی هەژمارەکەوە مووچەکانیان وەردەگرن. 

 

ئەوەی پێویستە بیزانیت: زیاتر لە 300 ئامێری ATM لە 100 شوێنی جیاواز لە هەرێمی کوردستان دانراون، هاوکات زیاتر لە 700 هەزار فەرمانبەر خۆیان لە نێو پرۆژەکە تۆمارکردووە.