ئەحمەد شەرع داوای هەڵگرتنی سزاکانی سەر سووریا دەکات

ئاڤا نیوز

 

ئەحمەد شەرع، داوای هەڵگرتنی سزاکانی سەر سووریا دەکات کە لە سەردەمی بەشار ئەسەدەوە بەسەریدا سەپێنراون.

 

وێنە گەورەکە: لە سەردەمی دەسەڵاتی بەشار ئەسەد چەندین سزا لەلایەن وڵاتانی ڕۆژئاواوە بەسەر سووریادا سەپێنراون و تاوەکو ئێستاش بەردەوامن، دوای کۆتاییهاتنی رژێمی ئەسەد داوا دەکرێت سزاکانی سەر ئەو وڵاتە هەڵبگیرێن و تەحریرولشام-یش لە لیستی تیرۆر دەربهێنرێت.

 

لێدوانی فەرمی: ئەحمەد شەرع، فەرماندەی هێزەکانی تەحریرولشام کە ئێستا کەسی یەکەمی سووریایە لە چاوپێکەوتنێکدا لەگەڵ ڕۆژنامەی نیویۆرک تایمز ڕایگەیاند: ڕێگە نادات سووریا بکرێتە خاڵێک بۆ هێرشکردنە سەر ئیسرائیل یان هەر وڵاتێکی دیکە، هاوکات داوای لە ئیسرائیل کرد لە خاکی سووریا بکشێتەوە.

 

زانیاریی زیاتر: بیانووی هێرشەکانی ئیسرائیل بۆ سەر سووریا بەمەبەستی لاوازکردنی حیزبوڵڵا بوو کە بە مەترسی بۆ سەر وڵاتەکەی دەزانی، ئەحمەد شەرع دەڵێت "ئێستا ئەم پاساوە نەماوە".

 

ئەمەش بزانە: تەحریرولشام بە سەرۆکایەتیی ئەحمەد شەرع تاوەکو ئێستا لە لیستی تیرۆری نێودەوڵەتیدایە، سووریاش کۆمەڵێک سزای لەسەرە، دەسەڵاتی نوێی سووریا ڕایگەیاندووە ئامانجی سەرەکییان سەقامگیریی سووریایە و داوا لە وڵاتانی ڕۆژئاوا دەکات سزاکانی سەر وڵاتەکەی هەڵبگرێت کە لە سەردەمی ئەسەد بەسەریدا سەپێنرابوون.

 

لەلایەکی دیکەوە: لەدوای ڕووخانی ڕژێمی ئەسەد، میدیای ئەمریکی بڵاویانکردووەتەوە کە ئیدارەی ئەمریکا بیر لەوەدەکاتەوە تەحریرولشام لە لیستی تیرۆر دەربهێنێت. کۆمەڵگەی نێودەوڵەتیش نوێنەریان بۆ گفتوگۆ لەگەڵ ئەحمەد شەرع دیاریکردووە.

 

باکگراوند: لە ڕۆژی 8ی دیسێمبەر هێزەکانی ئۆپۆزیسیۆنی سووریا بە سەرپەرشتی ئەحمەد شەرع توانییان دیمەشقی پایتەختی سووریا کۆنترۆڵ بکەن و کۆتایی  بە دەسەڵاتی بەشار ئەسەد بهێنن.