لە هەولێر کارگەیەکی ڕیسایکلین دادەمەزرێنرێت

ئاڤا نیوز

 

شارەوانی هەولێر لێکۆڵینەوە بۆ دامەزراندنی کارگەیەکی ڕیسایکلینی خۆڵ و خاشاک دەکات، ئێستا دەرخستەی بوونیادنانی کارگەکە لە جێبەجێکردندایە.

 

وێنە گەورەکە: ڕۆژانە لە ڕێگەی شەش کۆمپانیانەوە دوو هەزار تۆن زبڵ و خاشاک لە سنووری شارەوانییەکانی هەولێر کۆدەکرێتەوە، کە تێچووی مانگانەی یەک ملیار و 400 ملیۆن دینارە، کارگەی ڕیسایکلین یارمەتیدەر دەبێت بۆ پاککردنەوەی ژینگە و دووبارە بەکارهێنانەوەی شتومەکە بەکارهێنراوەکان.

 

لێدوانی فەرمی: کارزان هادی، بەڕێوەبەری شارەوانیی هەولێر بە ئاڤای گوت: "ڕووبەرێک لە کانی قرژاڵە دابینکراوە بۆ ئەوەی کارگەی ڕیسایکلینی لەسەر بوونیادبنرێت، ئێستا کار لەسەر ئامادەکردنی دەرخستەی پڕۆژەکە دەکرێت."

 

ئەوەی پێویستە بیزانیت: زیاتر لە هەزار ژینگەپارێز لە شەش کۆمپانیا بەشێوەی 24 کاتژمێر زبڵ و خاشاک لە سنووری پارێزگای هەولێر کۆدەکەنەوە، دواتر لە کانی قرژاڵە ژێرخاک دەکرێت.

 

بۆچی گرنگە: لە کارگەی ڕیسایکلین زبڵ و خاشاک بە سێ شێواز مامەڵەی لەگەڵ دەکرێت، بەشێکی دەسووتێنرێت و وزەی لێ بەرهەم دەهێنرێت، بەشێکی جیادەکرێتەوە بۆ دووبارە بەکارهێنانەوە و بەشی سێیەم ئەو زبڵ و خاشاکەی کەڵکی بەکارهێنانەوەی نییە ژێرخاک دەکرێت.