لیستی مووچەی مانگی 12 ئامادە دەکرێتەوە و دوو بڕگەی بۆ زیاد دەکرێن

ئاڤا نیوز

لەسەر داواکاریی وەزارەتی دارایی عێراق، لیستی ناوی مووچەخۆران بۆ مووچەی مانگی 12 ئامادە دەکرێتەوە و بۆ هەر مووچەخۆرێک دوو بڕگەی نوێ زیاد دەکرێن.

وێنە گەورەکە: لە كۆبوونەوەی 15ی ئەم مانگەی نێوان شاندی حكومەتی هەرێمی كوردستان و وەزارەتی دارایی عێراق، بڕیار درا لە ماوەی 10 ڕۆژدا سەرجەم کێشە تەکنیکییەکانی لیستی ناوی مووچەخۆران چارەسەر بکرێن و تەیف سامی گوتبووی تاوەکو کێشەکان چارەسەر نەکرێن ئامادە نییە مووچەی مانگی 12 بنێرێت. 

ئەوەی پێویستە بیزانیت: لەسەر ڕاسپاردەی تەیف سامی دوو ڕۆژە شاندێکی وەزارەتی دارایی عێراق لە هەولێرە و لەگەڵ وەزارەتی دارایی و ئابووریی کوردستان کار لەسەر چارەسەرکردنی گرفتەکان دەکەن. شاندەکە لە سێ کەس پێکهاتووە و هەفتەیەک لە هەولێر دەمێننەوە.

زانیاریی تایبەت: ئاڤا زانیویەتی شاندەکەی عێراق داوایان كردووە لیستی مووچەی مانگی 12 جارێکی دیکە ئامادەبکرێتەوە و بۆ هەر مووچەخۆرێک دوو بڕگە زیاد بکرێن:

یەکەم: زیادکردنی بڕگەیەکی تایبەت بە ژمارەی ناسنامە یاخود کارتی نیشتمانی مووجەخۆران.

دووەم: بڕگەیەکی دیکە زیاد بکرێت تایبەت بە دیارکردنی ڕێکەوتی دامەزراندنی فەرمانبەران.

ئەوەی ئێستا ڕوودەدات: بەهۆی ئەو داواکارییە نوێیە، وەزارەتی دارایی فەرمانگەکانی ئاگادار کردووەتەوە بەزووترین کات و بە ڕەچاوکردنی ئەو دوو داواکارییە، لیستەکان بگەڕێننەوە، بۆ ئەوەی کێشە بۆ لیستی مووچەی مانگی 12 دروست نەبێت. ئەمە لەکاتێکدایە لە 9ی ئەم مانگەوە لیستی مووچەی مانگی 12 بۆ بەغدا نێردراوە.