مەلەفی خەڵک؛ ئاڤا بەدواداچوون بۆ دامەزراندنی 168 کەس لە قەزای کفری دەکات

ئاڤا نیوز

 

ئاڤا بەدواداچوون کەیسی دامەزراندنی ژمارەیەک لە هاووڵاتییانی ئیدارەی گەرمیان دەکات کە ماوەی پێشوو لە ئەنجوومەنی وەزیرانەوە بڕیاڕی دامەزراندنیان بۆ دەرچوو.

 

وێنە گەورەکە: لەماوەی ڕابردوو بە بڕیاری سەرۆکوەزیران مەسرور بارزانی، فەرمانی دامەزراندن بۆ 168 کەس دەرچوو کە لە پسپۆڕی جیا جیا لە فەرمانگە و بەرێوەبەرایەتییەکانی سنووری قەزای کفری دابمەزرێن.

 

زانیاریی زیاتر: ئەو ژمارە کەسە پەیوەندییان بە ئاڤاوە کرد بۆ ئەوەی بەدواداچوون بۆ کەیسی دامەزراندنیان بکات و بزانن گرفتیان چییە کە تاوەکو ئێستا ئەو کەسانە نەچوونەتە سەر کار.

 

ئەوەی پێویستە بیزانیت: ڕۆژی 25ی 1ی ئەمساڵ سەرۆکایەتی ئەنجوومەنی وەزیران نووسراوێکی بۆ وەزارەتی دارایی کردووە تاوەکو ڕێکاری پێویست بگرێتە بەر بۆ دامەزراندنی ئەو ژمارە کەسە و ئیدارەیی گەرمیانیش هەموو ڕێککارە ئیدارییەکانی وەکو خۆی جێبەجێکردووە. 

لێدوانی فەرمی: ساهیر عەلی، قائیمقامی قەزای كفری بە ئاڤا نیوزی ڕاگەیاند، چەند جارێك نووسراومان كردووە و سەرجەم داواكارییەكانی دیوانی ئەنجوومەنی وەزیرانمان جێبەجێ كردووە، بەردەوام لەسەر هێڵین و بە ئێمە گوتراوە نووسراوی 168 كەسەکە لە دوایین خاڵە كە دیوانی سەرۆكایەتی ئەنجوومەنی وەزیرانە.  

 

گوتیشی، دوایین نووسراومان لە ڕۆژی 19-8ی ئەمساڵ بۆ دیوان ناردووە و دوای ئەوە هیچ زانیارییەكمان دەستنەكەوتووە.

سەرچاوەیەک لە دیوانی سەرۆكایەتیی ئەنجوومەنی وەزیران بە ئاڤای ڕاگەیاند، دامەزراندنی 168 كەسەکە هیچ گرفتێكی نییە، جێبەجێ دەكرێت تەنیا چەند ڕێككارێكی ماوە و دەگاتە كۆتایی.