مەزڵوم عەبدی لەبارەی کۆبانێ پێشنیازێک دەکات

ئاڤا نیوز

فەرماندەی گشتیی هێزەکانی هەسەدە پێشنیاز دەکات بۆ ڕەواندنەوەی مەترسییەکانی تورکیا، ناوچەیەكی لە چەك داماڵراو لە شاری كۆبانێ دروستبکرێت، بەسەرپەرشتی ئەمریکاش دووبارە هێزە ئەمنییەکان لەو شارەدا بڵاوبکرێنەوە.

وێنە گەورەکە: ماوەی چەند ڕۆژێکە گرووپە چەکدارەکانی ئۆپۆزیسیۆنی سووریا کە تورکیا پشتیوانییان دەکات، فشارەکانیان بۆ سەر کانتۆنی کۆبانێی ڕۆژئاوای کوردستان چڕکردووەتەوە، ئەمڕۆش بەنێوەندگیری ئەمریکا هەسەدە و گرووپە چەکدارەکان تا کۆتایی ئەم هەفتەیە ئاگربەستیان ڕاگەیاند.

لێدوانی فەرمی: مەزڵوم عەبدی، فەرماندەی گشتیی هێزەکانی سووریای دیموکرات (هەسەدە) لە هەژماری فەرمی خۆی لە تۆڕی ئێکس بڵاویکردەوە، بە ئامانجی پابەندبوونی جێگیریان بۆ بەدیهێنانی ئاگربەستی سەرتاسەری لە هەموو سووریادا، ئامادەیی خۆیان ڕادەگەیێنن بۆ پێشكەشەكردنی پێشنیازی دامەزراندنی ناوچەیەكی لە چەك داماڵراو لە شاری كۆبانێ.

مەزڵوم عەبدی ئامادەیی دەردەبڕێت بۆ سەرلەنوێ دابەشكردنەوەی هێزە ئەمنییەكان لەژێر سەرپەرشتی و بوونی ئەمریکادا، ئەو دەستپێشخەرییەش بەمەبەستی چارەسەكردنی مەترسیە ئەمنییەكانی توركیا و گەرەنتیکردنی سەقامگیرییە لە ناوچەكەدا بەشێوەیەكی هەمیشەیی.

باکگراوند: سەرەتای گرژییەکان دەگەڕێتەوە بۆ ڕووخانی حکومەتی سووریا و کشانەوەی سوپای ڕووسیا لە کۆبانێ لە دوو هەفتەی ڕابردوودا، کە دوای هێرشی گرووپە چەکدارەکانی نزیک لە تورکیا بۆ سەر عەفرین و کشانەوەی هەسەدە لە ساڵی 2018 دا، بۆ ئەوەی گرووپە چەکدارەکان هێرشی نەکەنە سەر تێیدا جێگیر بوون.