قائانی داوای كردووە هێرشەكانی سەر هەرێمی كوردستان ڕابگیرێن

ئاڤا نیوز

رۆژنامەی نیویۆرک تایمزی ئەمریکی ئاشکرایکرد، ئێران داوای لە گرووپە چەکدارەکان کردووە هێرشەکانیان بۆ سەر هێزەکانی ئەمریکا لە عێراق و سووریا ڕابگرن، بە دیاریكراویش لەهەرێمی كوردستان.

ئەوەی پێویستە بیزانیت: بەرپرسانی ئێرانی و عێراقی بە رۆژنامەکەیان ڕاگەیاندووە، محەمەد شیاع سوودانی، سەرۆکوەزیرانی عێراق ڕۆڵی هەبووە لە کەمکردنەوەی هێرشی گرووپە چەکدارەکانی نزیک لە ئێران بۆ سەر هێزەکانی ئەمریکا.

زانیاریی زیاتر: سوودانی بە فەرماندەی گرووپە چەکدارەکانی عێراق و ئیسماعیل قائانی فەرماندەی فەیلەقی قودسی ئێرانی گوتووە، هێرشە بەردەوامەکان بۆ سەر هێزەکانی ئەمریکا دانوستانەکانی نێوان واشنتن و بەغدای سەبارەت بە کشانەوەی هێزەکانی هاوپەیمانان لە عێراق ئاڵۆز کردووە، قائانی داوایشی کردووە گرووپە چەکدارەکان هێرشەکانیان بۆ سەر هەرێمی کوردستان ڕابگرن. سەبارەت بە سووریا، ئێران داوای کردووە  گرووپە چەکدارەکانی هاوپەیمانی هێرشەکانیان کەم بکەنەوە بۆ ئەوەی ئەمریکا هێرشیان نەکاتە سەر.

بۆچی گرنگە: گروپە چەکدارەکانی نزیک لە ئێران ناوبەناو بە درۆن هێرش دەکەنە سەر هەولێر، سوپای پاسدارانیش چەند جارێک بە پاساوی بوونی بارەگای "مۆساد" هێرشی مووشەکیی بۆ سەر هەولێر کردووە کە دواینیان ناوەڕاستی مانگی یەکی ئەمساڵ بوو کە بەهۆیەوە چەند کەسێکی سڤیل بوونە قوربانیی، هەرچەندە حکومەتی هەرێم و عێراقیش ئەوە ڕەتدەکەنەوە هیچ بارەگایەکی ئیسرائیل بوونی هەبێت.