پەیامێکی نوێ لە سەرۆک بارزانییەوە: مەترسییەکی دیکە لە عێراق سەریهەڵداوە

ئاڤا نیوز 

 

سەرۆک مەسعود بارزانی لە پەیامێکی نوێدا باسی دۆخی عێراق دەکات و دەڵێت،  شێوازی حكومڕانی لە عێراق نالۆژیکییە، لەجیاتی قەیران چارەسەر بکرێت قەیرانێکی دیکە دەخولقێنرێت. ئاماژە بۆ ئەوەش دەکات لەم ساڵانەی دواییدا مەترسییەكی دیكەش سەریهەڵداوە، ئەویش پەیدابوونی دەستە و گرووپن كە خۆیان پێ بەرزترە لە دەستوور و یاسا و عورفی دەوڵەتداری.

چیرۆکی سەرەکی: لە شاری هەولێر دووەمین فێستیڤاڵی ڕامان بۆ ئەدەب و کولتوور دەستیپێکرد. پەیامی سەرۆك بارزانی لەلایەن مەحموود محەممەد، وتەبێژی پارتی دیموكراتی كوردستان خوێنرایەوە و چەند تەوەرێکی لەخۆدەگرت.

لێدوای فەرمی: سەرۆک بارزانی لە پەیامەکەیدا باسی ئەوە دەکات جیهان بەرەوپێشەوە هەنگاوی ناوە كە بووەتە هۆی لەدایكبوونی جۆرێكی دیكە لە شێوازی ژیان و حكومڕانی وڵاتان، "لە وڵاتی ئێمەشدا ڕۆڵی ڕۆشنبیران زۆر دیار و بەرچاوە لە گۆڕانكاری و بەرەوەپێشبردنی كۆمەڵگە و گۆڕینی پەیوەندییە كۆمەڵایەتییەكان و شێواز و ڕەفتاری تاك و كۆمەڵی ئەم كۆمەڵگەیە".

بە ئاماژەکردن بەوەی ئەگەر دوێنێ ئەركی ڕۆشنبیران، ڕۆشنبیریكردنی خەڵك بووبێت لە ماف و  ئازادییە زەوتكراوەكان، سەرۆک بارزانی جەخت دەکاتەوە ئەمڕۆ ئەرکیان ڕۆشنبیركردنی كۆمەڵگەیە لە پاراستنی ئەو دەستكەوتانەی بە خوێن و خەبات بەدەست هاتوون.

لەلایەکی دیکەوە: سەبارەت بە عێراق سەرۆك بارزانی لە پەیامەکەیدا دەڵێت: "ئێمە لە وڵاتێكدا دەژین كە پێی دەگوترێت عێراق، وڵاتێكە بارگاوییە بە كۆمەڵێك قەیران و هەڵئاوساوە لە كێشە و گرفتی سیاسی و كۆمەڵایەتی و ئابووری، ژینگەی عێراق وایە كە بە ئاسانی دەتوانرێت كێشە و قەیرانی تێدا دروست بكرێت، هەر بۆیەش قەیران لەدوای قەیران لەسەر یەك كەڵەكە كراون، قەیران دەخوڵقێنرێ بۆ ئەوەی قەیرانێكی دیكەی پێ دابپۆشرێت، لەم وڵاتەدا  قەیران چارەسەر ناكرێت، بەڵكو ئیدارەی قەیران و كێشەكان دەدرێت، ئەم میتۆدەش بووەتە بەشێك لە هزری حكومڕانی و ئیدارەی ئەم وڵاتە".

سەرۆك بارزانی لە پەیامەكەیدا جەختیش دەكاتەوە: "سەرەڕای ئەم شێوازە نالۆژیكییەی حكومڕانی لە عێراق، مەترسییەكی دیكەش لەم ساڵانەی دوایی سەریهەڵداوە، ئەویش پەیدابوونی دەستە و گرووپن كە خۆیان پێ بەرزترە لە دەستوور و یاسا و عورفی دەوڵەتداری، ئەم هۆكارانە وایان كردووە كە ڕەوشی عێراق بەردەوام لە ئاڵۆزیدا بێت".