وەزارەتی پەروەردە کێشەی بەشێک لە مامۆستایانی ئاینیی چارەسەر دەکات

ئاڤا نیوز

وەزارەتی پەروەردەی حكومەتی هەرێمی كوردستان، كێشەی ژمارەیەك لە مامۆستای ئاینیی چارەسەر دەكات كە گرفتی پێدانی بڕوانامەی 12ـی ئامادەییان هەبوو تا لە زانكۆی 'ئیمام ئەعزەم' دەست بە خوێندن بكەن.

 

وێنە گەورەكە: ژمارەیەك لە مامۆستای ئاینیی داوایان لە ئاڤا میدیا كردبوو دەنگیان بە لایەنی پەیوەندیدارەکان بگەیەنێت بەهۆی ئەوەی گرفتی تەواوكردنی خوێندنیان لە كۆلێژی شەریعەی زانكۆی 'ئیمام ئەعزەم' بۆ دروست بووە، بەو پێیەی تاوەكو ئێستا بەڵگەنامەی دەرچوونی پۆلی 12ـی ئامادەییان بۆ زانكۆكە نەبردووە.

 

زانیاری بەدەستهاتوو: ئاڤا لە سەرچاوەیەكی تایبەتی نێو وەزارەتی پەروەردە زانیویەتی؛ دكتۆر ئالان حەمەسەعید، وەزیری پەروەردەی حكومەتی هەرێمی كوردستان كێشەی بڕوانامەی ئەو مامۆستا ئاینیانەی چارەسەركردووە كە بۆ تەواوكردنی خوێندن ڕوویان لە زانكۆی ئیمام ئەعزەم كردووە، و ئێستا دەرچووانی زانكۆكە دەتوانن بەڵگەنامەی دەرچوونی پۆلی دوازدەی ئامادەیی بۆ ڕاگرایەتی كۆلێژی شەریعە ببەن.