بۆ جووتسایدی چۆمان -حاجی ئۆمەران 200 ملیار دینار تەرخان دەکرێت

ئاڤا نیوز

 

پڕۆژەی جووتسایدی چۆمان-حاجی ئۆمەران کە رێگایەکی گرنگە و هەولێر بە تاران دەبەستێتەوە، خاڵی سنووری لەسەرە و رێگایەکی گەشتیاریشە، بە بەڵێندەرێکی نوێ دەدرێت کە 14 ساڵە تەواونەکراوە، قایمقامی چۆمان لەوبارەیەوە ئەڵێت "دەست بە جێبەجێکردنی پڕۆژەکە کراوە'.

 

وێنە گەورەکە: ساڵی 2011 بەردی بناغەی پڕۆژەی جووتسایدی چۆمان-حاجی ئۆمەران دانرا، بە درا بە کۆمپانیایەکی ڕۆمانی، بەڵام ئەو پێی تەواو نەکرا، دواتر بەهۆی قەیرانی دارایی پرۆژەکە چەند ساڵیک وەستا و   دواتر درایە کۆمپانیایەکی خۆماڵی، ئەویش نەیتوانی جووت سایدەکە تەواو بکات، بۆیە ئیدارەی سەربەخۆی سۆران پڕۆژەکەی لەو بەڵێندەرە وەرگرتووەتەوە و بە بەڵێندەرێکی دیکەی داوە.

لێدوانی فەرمی: کامەران بارزان، قایمقامی چۆمان بە ئاڤا میدیای ڕاگەیاند: کێشەی زۆرمان لەگەڵ کۆمپانیای پێشوو هەبوو، بۆیە پڕۆژەکەمان لێوەرگرتەوە، ئێستا پڕۆژەکە بە کۆمپانیای (نۆرس لایت) دراوە و دەستی بە جێبەجێکردنی کارەکان کردووە.

ئەوەی پێویستە بیزانیت: تێچووی پڕۆژەکە زیاتر لە 200 ملیار دینارە و لەسەر ئەرکی حکومەتی هەرێمی کوردستان دروست دەکرێت.

 

بۆچی گرنگە: بە تەواوبوونی پڕۆژەکە ماوەی گەیشتنی ئۆتۆمبێل لە حاجی ئۆمەرانەوە بۆ چۆمان 50% کەم دەبێتەوە، واتا لە 20 خولەکەوە بۆ هەشت خولەک کەم دەبێتەوە.