جارێکی دیکە پاسپۆرتی عێراق وەک لاوازترین پاسپۆرتەكانی جیهان دەستنیشان دەکرێت

ئاڤا نیوز

 

بەگوێرەی ڕاپۆرتی ساڵانەی "پاسپۆرت ئیندێکس"ـی جیهانی، پاسپۆرتی عێراقی بە یەکێک لە لاوازترین پاسپۆرتەکانی جیهان دادەنرێت و دەکەوێتە دوای سۆماڵیش.

 

وێنە گەورەکە: ئەمڕۆ پێنجشەممە 19-12-2024، پاسپۆرت ئیندێکس، لیستی بەهێزترین و لاوازترین پاسپۆرتەكانی جیهانی بۆ ساڵی 2024 ئاشکرا کرد، ئەوەش بە پشتبەستن بە چەند بنەمایەک، گرنكترینیان هه‌ڵگرانی پاسپۆرتی هەر وڵاتێک توانای سەردانی زۆرترین وڵاتیان هەیە بەبێ ڤیزا.

 

زانیاریی زیاتر: بەپێی ڕاپۆرتەکە هاووڵاتییانی عێراق پێویستە ڤیزا بۆ 152 وڵاتی جیا جیا وەربگرن پێش گەشتکردنیان، زۆر جاریش داواکارییەکانیان لە باڵیۆز و کونسوڵخانەکان ڕەتدەکرێتەوە، لەکاتێکدا دەتوانن بەبێ ڤیزە سەردانی 11 وڵات بكەن و لە 35 وڵاتیش لە كاتی گەیشتن ڤیزە وەردەگرن.

 

ئەمەش بزانە: پلەبەندی پاسپۆرتی عێراقی بۆ ساڵی 2024 تەنیا پێش ئەفغانستان و سووریا كەوتووە و پێشبینی دەکرێت دوای ڕوخانی ڕژێمی ئەسەد پلەبەندی پاسپۆرتی سووری بەرزببێتەوە، ئێستاش سۆماڵ پاسپۆرتەکەی لە عێراق بەهێزترە بە جیاوازی یەک پلە.