داواكاری گشتی بەدواداچوون بۆ زیادبوونی ڕێژەی تاوان دەكات

ئاڤا نیوز

داواکاری گشتی بە هەماهەنگی لەگەڵ ڕێکخراوی نەتەوەیەکگرتووەکان بەدواداچوون بۆ زیادبوونی ڕێژەی تاوان لە هەرێمی کوردستان دەکات. 

 

وێنە گەورەكە: سەرۆكایەتی داواكاری گشتیی هەرێمی كوردستان بە هەماهەنگی لەگەڵ پڕۆگرامی پەرەپێدانیی نەتەوەیەكگرتووەكان UNDP و دەزگا ئەمنی و دادوەری و چاكسازییەكانی حكومەتی هەرێمی كوردستان، سەرقاڵی كۆكردنەوە و شیكردنەوەی داتا و ئاماری سەرجەم تاوانباران و جۆری تاوانەكانە بەمەبەستی دیاریكردنی ڕێژەی تاوان و هۆكار و پاڵنەرەكان بۆ زیادبوونی دیاردەی تاوانكاری لەنێو كۆمەڵگەدا.

 

چی ڕوویدا: بۆ ئەم مەبەستە سەرۆكایەتیی داواكاری گشتی لەڕێگەی پڕۆگرامی پەرەپێدانی نەتەوەیەكگرتووەكان UNDP خولێكی ڕاهێنانی بۆ ژمارەیەك دادوەر و كارمەندانی یاسایی ڕێكخست، تێیدا بەشداربووان بە نوێترین پڕۆگرام و شێوازی بەداتاكردنی زانیاریی جۆری تاوانەكان و دیاریكردنی ڕێژەی تاوانباران، ئاشناكران.

 

لێدوانی فەرمی: سەرپەرشتیارانی بەشی بەدواداچوونی دیاردەی تاوانكاری سەر بە سەرۆكایەتی داواكاری گشتی ڕایدەگەیێنن، بە لەبەرچاوگرتنی سروشت و شێوازی كۆكردنەوەی ئامار و داتاكان، بە درێژایی ساڵی نوێ؛ بەشداربووانی پڕۆگرامەكە لە سەرجەم پارێزگا و ئیدارە سەربەخۆكانی هەرێمی كوردستان ئاشنا دەكرێن بە نوێترین شێوازی كۆكردنەوەی ئامار و شیكاری داتاكان، لەپێناو دیاریكردنی هۆكار و چارەسەرییەكانی دیاردەی تاوانكاری".

 

بۆچی گرنگە: یەكێك لە ئەركە سەرەكی و گرنگەكانی دەزگای داواكاری گشتیی سنوورداركردنی تاوانە لەنێو كۆمەڵگەدا بۆ ئەمەش پێویستی كۆكردنەوەی داتا و زانیاری لەبارەی ڕێژە و جۆری ئەو تاوانانەی لەنێو هەرێمی كوردستاندا باون، كاری سەرەكی و لەپێشینەی دەزگاكە دەبێت.