بەرپرسێکی باڵای ئیدارەی ترەمپ پەیوەندی بە مەسرور بارزانییەوە دەکات

ئاڤا نیوز 

سەرۆکوەزیران مەسرور بارزانی و ڕاوێژکاری داهاتووی ئاسایشی نیشتمانیی ئەمریکا، بە تەلەفۆن چەند بابەتێکیان تاوتوێ کرد و جەختیان لە پاراستنی ئاسایش و سەقامگیریی هەرێمی کوردستان ناوچەکە کردەوە.

چیرۆکی سەرەکی: سەرۆکوەزیران مەسرور بارزانی و مایکل واڵتز، کۆنگرێسمانی ئەمریکی، کە بەم دواییە لەلایەن دۆناڵد ترەمپ، سەرۆکی هەڵبژێردراوی ئەمریکا وەک ڕاوێژکاری ئاسایشی نیشتمانی دەستنیشان کرا، لە ڕێگەی پەیوەندییەکی تەلەفۆنییەوە چەند بابەتێکیان تاوتوێ کرد.

 

ڕاگەیێنراوی فەرمی: بەپێی ڕاگەیێنراوێکی حکومەتی هەرێمی کوردستان، مەسرور بارزانی و مایکل واڵتز گفتوگۆیان لەبارەی ئەم بابەتانە کردووە:

٠ دوایین پێشهات و گۆڕانکارییەکانی عێراق و هەرێمی کوردستان و ناوچەکەیان تاوتوێ کردووە و جەختیان لە پەرەپێدانی پەیوەندیی دوولایەنە و پاراستنی ئاسایش و سەقامگیری کردووەتەوە.

 

٠ سەرۆکوەزیران مەسرور بارزانی پیرۆزبایی لە واڵتز کردووە بە بۆنەی دەستنیشانکردنی وەک ڕاوێژکاری ئاسایشی نیشتمانیی ئەمریکا، ستایشی کردووە لەوەی تێگەیشتنی قووڵی لە بابەتە ئەمنی و پەیوەندیدارەکانی ناوچەکە هەیە.

 

٠ بیروڕایان لەبارەی دەرئەنجامەکانی هەڵبژاردنەکانی ئەم دواییەی هەرێمی کوردستان و ئەمریکا ئاڵوگۆڕ کردووە، هەردوو لا جەختیان لە گرنگی گۆڕانکاریی دیموکراسییانە و پتەوکردنی هاریکاری و هاوئاهەنگی نێودەوڵەتی لەمبارەیەوە کردووەتەوە.

 

٠ بەشێکی دیکەی گفتوگۆکانیان تایبەت بووە بە ڕۆڵی گرنگی هەرێمی کوردستان وەک هاوبەشێکی جێی متمانە لە ناوچەکەدا و پابەندبوون بە بەها و ئامانجە هاوبەشەکانی ئاشتی و ئاسایش.

٠ هەردوولا هاوڕابوون لەسەر گرنگی هەوڵە هاوبەشەکان بۆ ڕووبەڕووبوونەوەی ئاستەنگ و ئاڵنگارییەکان و دڵنیابوون لە بەردەوامبوونی سەقامگیری.