زیاتر لە 124 هەزار پەنابەری سووری لە تورکیا گەڕاونەتەوە وڵاتەکەیان

ئاڤا نیوز

 

بە گوێرەی ئەو ئامارەی وەزارەتی ناوخۆی تورکیا بڵاویکردووەتەوە، تەنها لە ماوەی 14 ڕۆژدا زیاتر لە 124 هەزار و 325 پەنابەری سووری بە ئارەزووی خۆیان گەڕاونەتەوە سووریا. 

 

وێنە گەورەکە: لە 8ی دیسەمبەرەوە لە دوای کەوتنی دەسەڵاتی بەشار ئەسەد لە سووریا، بەشێکی زۆری ئاوارە سوورییەکان کە بەهۆی سەرهەڵدانی شەڕەوە لە دوای ساڵی 2011 چوونەتە تورکیا، پەیتا پەیتا دەگەڕێنەوە خاکی خۆیان. 

 

لێدوانی فەرمی: عەلی یەرلیکایە، وەزیری ناوخۆی تورکیا لە کۆنگرەی ئاکپارتی ڕایگەیاند، لە بەراوری 9-12-2024 ەوە زیاتر  124 هەزار و 325 سووری بە سەربەرزی و بە خواستی خۆیان گەڕاونەتەوە سووریا.

 

ئەوەی پێویستە بیزانیت: تورکیا وەک وڵاتێکی دراوسێی سووریا لە دوای تێکچوونی دۆخی سووریا پێشوازی لە ژمارەیەکی زۆری کۆچبەری سووریی کرد، حکومەتی ئەو وڵاتە هەمیشە جەخت لەو دەکاتەوە کە لەو ماوەیەدا خزمەتێکی زۆریان بەوان کردووە و سوورییەکان بە ئارەزووی خۆیان دەگەڕێنەوە وڵاتەکەیان.

 

باکگراوند: لە دوای ساڵی 2011ەوە ژمارەیەکی زۆر لە هاووڵاتییانی سووریی کە ژمارەیان دەگەیشتە نزیکەی سێ ملیۆن وەک پەنابەر ڕوویان لە تورکیا کرد.