سوودانى: لە ساڵڕۆژی داگیركردنی مووسڵ لەلایەن داعش فڕۆكەخانەی نێودەوڵەتی مووسڵ دەكەینەوە

ئاڤا نیوز

 

سەرۆكوەزیرانی عێراق ڕایدەگەیەنێ، لە ساڵڕۆژی داگیركردنی مووسڵ لەلایەن داعشەوە، فڕۆكەخانەی نێودەوڵەتی مووسڵ دەكەنەوە، ئەمەش وەك پەیامێك "بە ڕووی تیرۆر و تۆقاندن".

 

وێنە گەورەكە: ئەمڕۆ یەكشەممە 22-12-2024، محەممەد شیاع سوودانی، سەرۆكوەزیرانی عێراق لە بەدواداچوونێكی مەیدانیدا بۆ بەسەركردنەوەی پڕۆژەی دروستكردنی فڕۆكەخانەی نێودەوڵەتی مووسڵ، سەردانی پارێزگای نەینەوای كرد.

 

ڕاگەیێنراوی فەرمی: نووسینگەی ڕاگەیاندنی سەرۆكوەزیرانی عێراق لە بارەی سەردانەكەی ئەمڕۆی سوودانی بۆ شاری مووسڵ ڕاگەیێنراوێكی بڵاوكردووەتەوە، کە تێیدا هاتووە، "پێداچوونەوەمان بەدواهەمین قۆناغەكانی دروستكردنی ڕێڕەوی فڕینی فڕۆكەخانەی نێودەوڵەتی مووسڵ و هۆڵە جۆراوجۆرەكانی كرد كە لەئێستادا 80%ـی كارەكانی تەواوبووە".

 

زانیاریی زیاتر: سوودانی فەرمانی بە كۆمپانیای جێبەجێكاری پڕۆژەكە كرد كە لەزووترین كاتدا ئاستەنگەكانی بەردەم تەواوكردنی پڕۆژەكە لابدات بۆ ئەوەی لە كاتی دیاریكراوی خۆیدا بكرێتەوە.

 

باكگراوند: پێش 10 ساڵ لە ڕێككەوتی 10ـی حوزەیرانی 2014، مووسڵ لەلایەن ڕێكخراوی داعش داگیركرا و دوای سێ ساڵ شارەكە كۆنتڕۆڵ كرایەوە، بەڵام ژێرخانی شارەكە بەتەواوی خاپوور بوو، ماوەی چەند ساڵێكە هەڵمەتی نۆژەنكردنەوەی شارەكە دەستی پێكردووە و پڕۆژەكان لە سێكتەرە جۆراوجۆرەكاندا بەخێرایی جێبەجێ دەكرێن. یەكێك لە گرنگترین پڕۆژەكانیش فڕۆكەخانەی نێودەوڵەتی مووسڵە كە بڕیارە لە 10-06-2025 لە ساڵڕۆژی داگیركردنی شارەكە بەفەرمی بكرێتەوە.