باخچەلی: یەپەگە لە داهاتووی سووریا جێی نابێتەوە

ئاڤا نیوز

دەوڵەت باخچەلی، سەرۆکی مەهەپە ڕایدەگەیێنێت، یەپەگە لە داهاتووی سووریا جێی نابێتەوە و پێویستە چەكەكانیان ڕادەستی حكومەتی ڕاگوزەر بكەن، لەبارەی باكووری كوردستان و توركیاش دەڵێت: "دەم پارتی بووەتە داردەستی جەهەپە".

 

وێنە گەورەكە: سەرۆکی پارتی بزووتنەوەی ناسیۆنالیستی تورکیا "مەهەپە" ئەمڕۆ یەكشەممە 22-12-2024، كۆنفرانسێكی ڕۆژنامەوانی ئەنجامدا، تێیدا تیشكی خستە سەر چەند پرسێكی گرنگی ناوچەكە و گرژییەكانی ئەمدواییەی نێوان كوردانی ڕۆژئاوای كوردستان و ئیدارەی نوێی سووریا.

 

ڕاگەیێنراوی فەرمی: باخچەلی ڕایگەیاند، ئێمە كێشەی نەتەوەییمان لەگەڵ كوردەكان نییە، بەڵام پەكەكە و یەپەگە ڕێكخراوی تیرۆرستین. مەبەستمانە ئاشتی و ئارامی بۆ سووریا و ناوچەكە بگەڕێتەوە و ڕێگە نادەین یەك چەكداری سەر بە یەپەگە لەسەر سنوورەكانی توركیا هەناسە هەڵبكێشێت.

 

سەرۆكی مەهەپە، دەم پارتی بەوە تۆمەتبار دەكات كە بووەتە ئامرازی دەستی جەهەپە بە جێگەی ئەوەی ببێتە پارتێكی وڵاتی توركیا و ئەجێندای جەهەپە و پارتی كرێكارانی كوردستان جێبەجێ دەكات.

 

لە گۆشەیەكی دیكە: باخچەلی بەپێویستی دەزانێت هەریەك لە بەشار ئەسەد، سەرۆكی هەڵاتووی سووریا و بنیامین نەتانیاهۆ، سەرۆكوەزیرانی ئیسرائیل، لەسەر تاوانی كۆمەڵكوژیی دڕندانە، لە دادگای لاهای نێودەوڵەتیی دادگایی بكرێن.