سوودانی: توانیمان مەترسییەکانی ناوچەکە لەسەر عێراق دووربخەینەوە

ئاڤا نیوز

 

سەرۆکوەزیرانی عێراق ڕایدەگەیێنێت، لەناو هەموو ئەو ئاستەنگییە ئەمنییانەی ناوچەکە بەخۆیەوە دەبینێت، حکومەت توانیویەتی مەترسییەکان لەسەر عێراق دوور بخاتەوە.

 

چیرۆکی سەرەکی: ئەمڕۆ محەممەد شیاع سوودانی، سەرۆکوەزیرانی عێراق سەردانی پارێزگای نەینەوای کرد و لەگەڵ بەرپرسان و فەرماندە سەربازییەکانی پارێزگاکە کۆبووەوە.

 

ڕاگەیێنراوی فەرمی: سوودانی لە کۆبوونەوەیدا لەگەڵ فەرماندە سەربازییەکانی نەینەوا ئاماژەی بەوەکردووە، پێویستە دەستکەوتە ئەمنییەکان بپارێزرێن و هەمووان کار بۆ ئارامی و ئاوەدانی نەینەوا بکەن، جەختیشی کردووەتەوە کە لە بەرپرسیارێتییە ئەمنییەکاندا دەبێت پیشەیی بوون بکرێتە بنەما و کار بە هیچ بنەمایەکی دیکە نەکرێت.

 

زانیاریی زیاتر: سوودانی لە کۆبوونەوەشیدا لەگەڵ نوێنەری پێکهاتەکانی نەینەوا گوتی، 10ـی حوزەیرانی ساڵی داهاتوو فڕۆکەخانەی مووسڵ دەکرێتەوە و لە 30 ڕۆژی داهاتووشدا بەردی بناغەی زنجیرەیەک پڕۆژەی خزمەتگوزاری دادەنرێت، جەختیشی کردووەتەوە کە تیرۆر و ئەجێندای دەرەکی زیانی بە نەینەوا گەیاند، بەڵام ئێستا عێراق لەسەر بنەمای ڕێزگرتن لە هاووڵاتیانی و کارکردن بۆ بەدیهێنانی داواکارییەکان لەسەر ڕێڕەوێکی دروست هەنگاو دەنێت.