چوارچێوەی هەماهەنگی بۆ ئاڤا: قەیس خەزعەلی سەلامەتە و بەمزووانە دەگەڕێتەوە عێراق

ئاڤا نیوز

 

دوای بڵاوبوونەوەی هەواڵی کوژرانی، ئەندامێکی چوارچێوەی هەماهەنگی ڕایدەگەیێنێت، قەیس خەزعەلی سەلامەتە و بۆ خوێندنی ئاینی و حەوزە لە ئێرانە، بەمزووانە دەگەڕێتەوە عێراق.

 

ئەوەی پێویستە بیزانیت: ماوەی چەند هەفتەیەکە قەیس خەزعەلی، ئەمینداری گشتی عەسایبی ئەهلی حەق لە کۆبوونەوەکانی چوارچێوەی هەماهەنگی و کۆبوونەوە سیاسییەکانی دیکەدا دەرناکەوێت، هاوکات دەنگۆی ئەوە بڵاوکراوەتەوە کە لە هێرشێکدا لە سنووری سووریا و عێراق بە ئامانج گیراوە، بەڵام نزیکەکانی ئەو تۆمەتانە ڕەتدەکەنەوە بەبێ ئەوەی بەڵگەی پێویست بڵاوبکەنەوە.

 

لێدوانی فەرمی: موختار ئەلموسەوی، ئەندامی چوارچێوەی هەماهەنگی لە پەرلەمانی عێراق بە ئاڤا نیوزی ڕاگەیاند، هەواڵی کوژرانی قەیس خەزعەلی یان برینداربوونی بەهۆی ڕووداوی هاتووچۆ و هەموو دەنگۆکانی دیکە، دوورن لەڕاستییەوە، ناوبراو تەندروستیی باشە و توشی هیچ ڕووداوێکی نەخوازراو نەبووە.

 

زانیاریی زیاتر: قەیس خەزعەلی نزیکەی دوو هەفتەیە لە ئێرانە و سەرقاڵی خوێندنی زانستی و حەوزەیە، بەوهۆیەش لە میدیا و کۆبوونەوە سیاسییەکاندا دەرناکەوێت، بەڵام لەڕێگەی نزیکەکانی کارە سیاسییەکانی خۆی ئەنجام دەدات، دوای پشووی حەوزەش بەمزووانە دەگەڕێتەوە عێراق.