بانکی ناوەندیی عێراق لەبارەی هەرێمی کوردستان بڕیارێکی نوێ دەردەکات

ئاڤا نیوز

مەرجی دانانی ڕەهنی دوو ملیار و 500 هەزار دینار لەسەر کۆمپانیاکانی ئاڵوگۆڕی دراو هەڵدەگیرێت، بەم بڕیارەش لەمەودوا کۆمپانیاکان لە بازاڕ دۆلار بە نرخی بانکی ناوەندی دەفرۆشن.

چیرۆکی سەرەکی: دوو ساڵ پێش ئێستا دوای بەرزبوونەوەی نرخی دۆلار بەرامبەر دینار، بانکی ناوەندیی عێراق بۆ کۆنترۆڵکردنی نرخ مەرجێکی قورسی لەسەر کۆمپانیاکانی ئاڵوگۆڕی دراو لە هەرێمی کوردستان دانا، ئەویش دانانی سەرمایەی دوو ملیار و 500 هەزار دینار بوو وەکو ڕەهن.

بۆچی گرنگە: لەمەودوا کۆمپانیاکانی ئاڵوگۆڕی دراو دەتوانن ئاسانتر دۆلار لە بانکی ناوەندی وەربگرن و کارەکانیان بکەن، هاووڵاتیانیش ئاسانتر دەستیان بە دۆلاری هەرزان دەگات.

لێدوانی فەرمی: بڵند محەممەد، بەڕێوەبەری گشتیی تۆمارکردنی کۆمپانیاکان بە ئاڤا نیوز گوت: لەمەودوا کۆمپانیاکان دەتوانن دۆلار بە نرخی بانکی ناوەندی بفرۆشن کە بەهای هەر 100 دۆلارێک 132 هەزار دینارە.

ئەوەی پێویستە بیزانیت: لە هەرێمی کوردستان 600 کۆمپانیای ئاڵوگۆڕای دراو هەیە، دابەشی دوو گرووپ دەبن، گرووپی ئەی لە پێنج کۆمپانیا پێکدێن و سەرمایەی ڕەمزییان پێنج ملیار دینارە، گرووپی بی لە 10 کۆمپانیا پێکدێت و سەرمایەکەیان دوو ملیار و نیوە.

زانیاری زیاتر: دوای بڕیارەکە گرووپی ئەی دەسەڵاتیان پێدەدرێت لە بازاڕ و فڕۆکەخانەکان دۆلار بە نرخی بانکی ناوەندی بە گەشتیاران بدەن، گرووپی بیش تەنها لە فڕۆکەخانەکان ئەو دەسەڵاتەیان پێدەدرێت.