لە ساڵێکدا بە سەرمایەی 240 ملیۆن پرۆژەکانی وەبەرهێنان مۆڵەتیان وەرگرتووە

ئاڤا میدیا 

 

دەستەی وەبەرهێنانی دهۆک ڕایگەیاند، لە کابینەی نۆیەمدا گرنگییەکی زۆر بە کەرتی وەبەرهێنان لە پارێزگاکە دراوە، تەنیا ئەمساڵ 35 پڕۆژە لەسەر ڕووبەی یەک ملیۆن مەتر دووجا زەوی کەوتوونەتە بواری جێبەجێکردنەوە.

 

وێنە گەورەکە: لە ساڵی 2007ــەوە تاوەکو ئێستا 317 پرۆژەی وەبەرهێنان لە دهۆک مۆڵەتیان وەرگرتووە، سەرمایەکەیان زیاترە لە شەش ملیار دۆلار، لەو پرۆژانەش 109یان لەماوەی کابینەی نۆیەمی حکومەتی هەرێمی کوردستاندا مۆڵەتیان وەرگرتووە و سەرمایەکەیان زیاترە لە 904 ملیۆن دۆلار. 

 

لێدوانی فەرمی: هەڤاڵ سدیق، بەڕێوەبەری وەبەرهێنانی دهۆک لە کۆنگرەیەکی ڕۆژنامەوانیدا ڕایگەیاند: لەمساڵدا وەبەرهێنانی دهۆک مۆڵەتی بە 35 پرۆژەی وەبەرهێنان داوە، سەرمایەی ئەو پرۆژانە زیاترە لە 240 ملیۆن دۆلار و لەسەر ڕووبەری زیاتر لە یەک ملیۆن مەتر دووجا لە جێبەجێکردندان.

 

ژمارەکان وا دەڵێن: پرۆژەکانی وەبەرهێنان بەسەر قەزا و ناحییەکانی سەر بە پارێزگای دهۆکدا بەم شێوەیە دابەشبوون:

سەنتەری قەزای دهۆک نۆ پرۆژە، سێمێل 16 پرۆژە، ئامێدی پێنج پرۆژە، ئاکرێ سێ پرۆژە، بەردەڕەش دوو پرۆژە، پرۆژەکانیش بەم جۆرە بەسەر سێکتەرە جیاوازەکاندا دابەشبوون: گەشتیاری نۆ پڕۆژە، نیشتەجێبوون سێ پڕۆژە، بازرگانی حەوت پڕۆژە، پیشەسازی پێنج پڕۆژە، تەندروستی دوو پڕۆژە، خزمەتگوزاری یەک پڕۆژە، فێرکردن دوو پڕۆژە و کشتوکاڵ یەک پڕۆژە.

 

ئەمەش بزانە: بەپێی ئاماری دەستەی وەبەرهێنان، لەسەدا 96ی دەستی کار لە پرۆژەکانی وەبەرهێنان لە دهۆک، کرێکارانی خۆماڵین.