ئاڤا چیرۆکی دەستگیرکردنی ژنێکی جادووگەر لە هەولێر ئاشکرا دەکات

ئاڤا نیوز 

 

پۆلیسی پارێزگای هەولێر ژنێکیان دەستگیرکردووە، کە لە ڕێگەی چەند کەسێکەوە هەوڵی هەڵخەڵەتاندنی خەڵکی داوە، بەبیانووی بەیەکگەیشتن، جیابووەنەوە و بەختبەستن 300 بۆ هەزار و 200 دۆلاری لێ وەرگرتوون.

 

چیرۆکی سەرەکی: پۆلیسی هەولێر ژنێکی بەناوی (ک. ا. م) تەمەن 37 ساڵ دەستگیرکردووە، کە سیحر،  جادوو، فاڵگرتنەوە و چەندین کاری دیکەی نەشیاوی لە ڕێگەی تیمێکەوە ئەنجامداوە و بە سەدان کەسی هەڵخەڵەتاندووە و پارەی زۆری لە ڕێگەی هەژماری بانکی لێوەرگرتوون. دوای ئەوەی کە بەشێک لەو هاونیشتمانییانە بە فێڵەکانیان زانیوە لەلای پۆلیس سکاڵایان لەسەر تۆماکردووە.

 

لێدوانی فەرمی: کارزان ساڵح، وتەبێژی پۆلیسی هەولێر بە ئاڤای ڕاگەیاند، لە لێکۆڵینەوەکان دەرکەوتووە کە چەند کەسێک کاریان بۆ ئەو ژنە کردووە و خەڵکیان بۆ کۆکردووەتەوە، "لێکۆڵینەوە لەگەڵ تۆمەتبار بەردەوامە تاوەکو هەموو ئەو کەسانە دەستگیردەکەین کە هاوکارییان کردووە و هەر کەسێک لەو ڕێگەیەوە هەوڵی فێڵکردن لە خەڵک بدات ڕووبەرووی یاسا دەکرێتەوە."

 

ئەوەی پێویستە بیزانیت: ئەو جادووگەرە ناسراوە و زیاتر لە سێ ساڵە ئەو کارە دەکات، بە بیانووی جیابوونەی هاوسەر، گەیشتن بە خۆشەویستەکەی کۆمەڵێک بیانووی دیکە جادووی بۆ هاونیشتمانییان کردووە، لە بەرامبەر جادوویەکی تەڵاقدان 300 دۆلاری وەرگرتووە، بەگوێرەی قەبارەی داواکارییەکە نرخەکە زیادبووە و تاوەکو هەزار و 200 دۆلار بەرزبووەتەوە.