ئەردۆغان: پەکەکە کێشە دەخاتە نێوان برایەتی کورد و تورک

ئاڤا نیوز

 

ڕەجەب تەیب ئەردۆغان، سەرۆککۆماری تورکیا ڕایدەگەیێنێ، "دەبێت پەکەکە و داعش یان چەکەکانیان دابنێن، یان ئەوەتا لەگەڵ چەکەکانیان لەناو خاکی سووریا دەیاننێژین".

 

چیرۆکی سەرەکی: لەمیانی کۆبوونەوەیەک لەگەڵ فراکسیۆنی پارتەکەی لە پەرلەمانی تورکیا، ڕەجەب تەیب ئەردۆغان، سەرۆککۆماری تورکیا وتارێکی پێشکەش کرد، کە بەشێکی وتارەکەی تەرخانکرد بۆ قسەکردن لەبارەی ئاساییش و ئەمنییەتی تورکیا  و ئەو لایەنەنانەی کە وەک ئەردۆغان دەڵێت" مەترسین بۆ سەر ئەمنییەت و ئاسایشی وڵاتەکەی"، لەنێویاندا پارتی کرێکارانی کوردستان (پەکەکە) و ڕێکخراوی داعش.

 

لێدوانی فەرمی: سەرۆککۆماری تورکیا ڕایگەیاند، " سوورین لەسەر لەناوبردنی ئەو ڕێكخراوە تیرۆریستییانەی دەبنە مەترسی بۆ سەر ئاسایشی تورکیا و سووریا". ئەردۆغان گوتیشی، " ئەوان یان خۆیان چەک دادەنێن، یانیش لەگەڵ چەکەکانیان لە خاکی سووریا دەنێژرێن''.

 زانیاریی زیاتر: ئەردۆغان لە گوتارەکەیدا لەبەردەم فراکسیۆنی پارتەکەی گوتیشی:

 - پەکەکە کێشە دەخاتە نێوان تورک و کورد. ئێمە ئەو ڕێکخراوە تیرۆریستییە لەناو دەبەین کە بیەوێت لەنێوان ئێمە و خوشک و برا کوردەکانمان دیوارێک لە خوێن دروست بکات.

- تورکیا تاکە هاوپەیمانی ناتۆیە کە کاری لە پێشینەی لە نابردنی داعشە لە سووریا، بۆ ئەوە کەس وانە بە ئێمە نەڵێتەوە.

- ئەحمەد شەرع لەو ماوەیەدا بە شێوەیەکی باش ئیدارەی سووریا بەڕێوەدەبات. 

- لە ماویەکی نزیکدا کونسووڵخانەی تورکیا لە حەلەب دەکەینەوە.

 

لەلایەکی دیکە: بەگوێرەی ڕاپۆرتێکی نەتەوەیەکگرتووەکان، زیانی ئابووری تاوانەکانی بەشار ئەسەدی سەرۆکی هەڵاتووی سووریا نزیکەی 500 ملیار دۆلاربووە، تورکیا تیمێکی وەزارەتی وزە و وەبەرهێنان بۆ سووریا دەنێرێت بۆ ئەوەی بە زووترین کات ژێرخانی وزە و بەرهەمهێنان لە سووریا بوونیادبنرێت.